Hevserokê Giştî yê DEM Partiyê Tûncer Bakirhan diyar kir ku ji bo çareseriya pirsgirêka Kurd divê rê bê paqijkirin û got: “Birêz Ocalan dil û hêviya bi milyonan e. Heya hêviya bi milyonan di hucreyekê de di bin tecrîdê de be em ê ji vê samimiyeta we bawer nekin.”
Hevserokê Giştî yê Partiya Wekhevî û Demokrasiyê ya Gelan (DEM Partî) Tûncer Bakirhan di mîtînga “Ji bo aştiyê azadî” ya li Qada Îstasyonê ya Amedê hat lidarxistin de axivî. Bakirhan da zanîn ku em di pêvajoyeke dîrokî re derbas dibin û got: “Rêjîmên otorîter ên ku nasnameyên cuda biçûk dixin û wan ji ser dika dîrokê derdixînin, yek bi yek hildiweşin. Di nava alozî, krîz û pevçûnên li Rojhilata Navînê de, ya herî ewledar tevdebûn û qebûlkirina cudahiyan e.”
‘Ocalan dixwaze aştiya Tirkiyeyê pêk bîne’
Bakirhan bal kişand ser hewldanên Abdullah Ocalan ên ji bo çareseriyê û wiha got: “Birêz Ocalan çi dike? Ji bo ku Amed azad bibe, qeyûm tayinî vîna Amedê neyê kirin, koçerên Sêrtê bi nasnameya xwe bi awayê jiyana xwe bi awayekî azad bijîn nexşerêyekê amade dike. Birêz Ocalan nexşeyarêya aştiyê amade dike. Nexşerêya aştiyeke birûmet amade dike. Nexweşêray tenê ne ji bo kurdan ji bo hemû bawerî û nijadên li Tirkiyeyê bi awayekî wekhev bijîn amade dike. Birêz Ocalan dixwaze ku Tirkiye demokratik bibe. Birêz Ocalan dixwaze ku kurd bi awayekî azad bi zimanê xwe biaxive û bi zimanê dayikê perwerde bibe. Birêz Ocalan dixwaze ku qeyûm tayinî vîna gelê kurd neyê kirin. Dixwaze bila Amed vîna Amedê bi rê ve bibe, bila Êlih vîna Êlihê bi rê ve bibe, bila Sêrtê vîna Sêrtê bi rê ve bibe.”
‘Amed dibêje azadî ji Ocalan re’
Bakirhan di berdewamê de wiha axivî: “Birêz Ocalan bi misogerkirina aştiyê dixwaze Tirkiye li Rojhilata Navînê bibe welatekî bihêz. Bi misogerkirina aştiyê wê Tirkiye bi reformên demokratîk li herêmê bibe mînak. Birêz Ocalan nexşerêyeke ku her kes bi nasnameya xwe bi azadî bijî amade dike. Niha ez ji we dipirsim, gelo hûn bi birêz Ocalan re ne? Hûn bi vê nexşerêya çareseriyê ya demokratîk re ne ku wê birêz Ocalan di nêz de eşkere bike? Wê ev dengê we yê gur, wê ev hêza we di rojên pêş de ber bi pêvajoyeke aştiyê layiqî me hemûyan biçe. Meraq nekin, netirsin. Kurd, ne kurdên sedsal berê ne. Kurd ne ew kurd in ku li ser maseyê bên xapandin. Gelê kurd, gelê herî dinamik, gelê herî bihêz û rêxistinkirî yê herêmê ye. Heya hûn hebin, wê tu kes nikaribe we bixapîne. Heya hûn bihêz bin, wê kesên me red dikin werin muzakereyê. Ji ber vê bihêz bin, bawer bikin û bihêvî bin.”
‘Ocalan dil û hêviya milyonan e’
Bakirhan destnîşan kir ku kes nikare dilê bi milyonan kesî di 12 metrekareyan de asê bike û got: “Ocalan dilê milyonan e, hêviya milyonan e. Heya hêviya bi milyonan di hucreyekê de di bin tecrîdê de be em ê ji vê samimiyeta we bawer nekin. Di 12 metrekareyan de mUzakere nabe. Di hucreyeke 12 metrekareyan de demokrasî nabe. Bihêlin bila Ocalan bi gelê Amedê re hevdîtinêb ike, bihêlin gelê Amedê û Ocalan bên cem hev.”
