Mêrdîn-Rêxistina DEM Partiyê ya Mêrdînê, daxwaza îstîfakirina Şaredarê Qoserê Zeynî Îpek ê ku ji aliyê partiyê ve hatiye îxrackirin, kirin.
Rêxistina Partiya Wekhevî û Demokrasiyê ya Gelan (DEM Partî) a Mêrdînê, têkildarî Şaredarê Qoserê Zeynî Îpek ê ku di 27ê Kanûna 2024an de ji aliyê partiyê ve hatibû îxrackirin, daxuyaniyek da. Tevî nûnerên partiyên siyasî, saziyên demokratîk gelek kes beşdarî daxuyaniyê bûn. Di daxuyaniyê pankarta ‘Gel deng da partiyê neda bêexlaqiyê’ û dowîza ‘Niha ji te re çi tê gotin?’ hat hilgirtin. Girseya ku bi dirûşma ‘Zeynî îstîfa’ çûn bexçeyê şaredariyê û daxuyanî da.
Metna daxuyaniyê ji aliyê Hevserokê Partiya Herêmên Demokratîk (DBP) ya Qoserê Metîn Arslan ve hat xwendin.
Arslan anî ziman ku Zeynî Îpek li cem gel rewabûna xwe winda kirî û dê li dijî hişmendiya ku îradeya gel tune dihesibîne têbikoşin û wiha got: “Em duh li vir bûn, îro jî li vir in û em ê her li vir bin. Em carekê din bang dikin bila Zeynî Îpek îstîfa bike û ji gelê Qoserê lêborînê bixwaze. Em bang li hemû welatî û rêxistinên demokratîk dikin ku piştgiriyê bidin têkoşîna li dijî paqijkirina şaredariyê ji dagirkeran.”
Daxuyanî piştî çalakiya rûniştinê bi dawî bû.
