Cîgirê Hevserokên Giştî yên DEM Partiyê Tayip Temel bertek nîşanî girtina malper û hesabên Xê yên çapemeniya Kurdî da û wiha got: “Di serdemeke ku em li ser demokrasî û azadiyê diaxivin de sansura li ser çapemeniya Kurdî ku weşangeriya ji bo çareseriyê dike, nîşan dide ku israra neçareseriyê berdewam dike.”
Malper û hesabê Xê ya ajansa me, malpera rojnameya Azadiya Welat, malper û hesabê Xê yê Nûmedya24 û hesabê Xê yê Ajansa Berûyê ji aliyê BTKê ve hatin astengkirin. Nerazîbûn û şermezarkirina li dijî sansura li ser çapemeniya Kurdî berdewam dikin.
‘Israra neçareseriyê berdewam dike’
Cîgirê Hevserokên Giştî yê DEM Partiyê ji Çapemenî û Propagandayê Berpirsyar Tayîp Temel ji ajansa me re axivî û bertek nîşanî sansur û astengiya malperên çapemeniya Kurdî da.
Tayîp Temel anî ziman ku sansur û astengiya li ser malper û hesabên Xê ya li ser çapemeniya Kurdî di vê pêvajoyê de nayê qebûlkirin û wiha got: “Di serdemeke ku em li ser demokrasî û azadiyê diaxivin de sansura li ser çapemeniya Kurdî ku weşangeriya ji bo çareseriyê dike, nîşan dide ku israra neçareseriyê berdewam dike.”
