Li başûrê Kurdistanê YNKê û Nifşê ji bo hewldana avakirina hikumetê bi hevpeymanekî tifaqek ava kir.
Li ser pêkanîna hilbijartinên parlementoya başûrê Kurdistanê re 21 meh derbas bûne û heya niha hikumet nehatiye avakirin. Di hilbijartinê de PDKê 39 kursî, YNKê 23 kursî û Partiya Nifşê Nû 15 kursî bi dest xistibûn. Lê ji ber ku lihevhatinek di navbera partiyên başûrê Kurdistanê de pêk nehatiye, heya niha Hikûmeta Herêma Federal a Başûrê Kurdistanê nehatiye avakirin.
Partiyên YNK û Nifşê Nû ji bo hewldana avakirina hikûmetekî bi hevpeymana, ‘Hevsengî û Vejîn’ tifaqek ava kir. Di merasîma hevpeymanê de li gel gelek endamên jer du partiyan, kesayet û rewşenbîr jî amade bûn.
Di merasîmê de Serokê YNKê Bafil Talabanî û Serokê Nifşê Nû Şasiwar Ebdulwehîd hevpeyman îmze kirin û piştre li ser rewşa herêmê daxuyaniyek dan.
Destpêkê Serokê Nifşê Nû Şasiwar Eebdulwehîd diyar kir ku hevpeymana wan ji bo guherîna şêwazê hikumeta li Herêma Kurdistanê ye ne dijî ti aliyeke siyasî ye, li aliyê din deriyê wan vekiriye ji bo hemû aliyan ku cihê xwe têde bigirin.
Serokê YNKê Bafil Talabanî jî destnîşan kir ku ev hevpeyman wê hevsengiya li Herêma Kurdistanê bide guherîn û wiha axivî: Em ê rewşa jiyanê ya xelkê xweş bikin. Vê rewşê; ne civaka navneteweyî, ne Bexda û ne jî gelê me qebûl dike û ne jî Xwedayê Mezin vê ji me qebûl dike.”
