Heyeta dadgehê ya doza Hurmuz Dîrîl carek din doz taloq kir. Parêzerê malbatê Rojhat Dîlsîz piştî danişînê got ku heyeta dadgehê dixwaze vê dozê di taritiyê de bihêle.
Danişîna 3yemîn a doza Hurmuz Dîrîl ê ku 11ê Çileya 2020an de li gundê Mêhrê yê navçeya Elkê ya Şirnexê hatibû windakirin li 1emîn Dadgeha Cezayên Giran a Şirnexê bi tevilbûna malbata Dîrîl, parêzerên malbata Dîrîl, Parlementerê DEM Partiyê yê Şirnexê Mehmet Zekî Îrmez, endam û rêveberên partiyên siyasî û Apro Dîrîl ê ji dozê girtî ye hate lidarxistin.
Piştî tespîta nasnameyan Apro Dîrîl axaft û got ku ew gotinên xwe yên danişînên berê dubare dike.
Daxwaza parêzerê malbatê hate redkirin
Piştre parêzerê malbata Dîrîl, Parêzer Rojhat Dîlsîz xwest ku dadgeh derbarê xwestekên wan ên doza berê de biryarekê bide. Rojhat Dîlsîz wiha got: “Li ser vê yekê heyeta dadgehê hemû xwestekên parêzerê malbatê red kir. Ev doz ji 2020an heya niha didome û tu xwestekên me nehatin qebûlkirin. Em cardin dibêjin kesek tenê nikare vê buyerê pêk bîne û di dema lêpirsînê de heyeta dadgehê û dozgeriyê bi awayek rêk û pêk lêkolîn ser dozê nekirin. Heyet cardin dixwaze ceza li Apro Dîrîl tenê bibire û kesên din ên gumanbar bê sûc bihêle. Ji ber ku heya niha derbarê daxwazên me yên zelalkirina dozê de heyeta dadgehê tu gavên erênî neavêtine. Her wiha em wisa difikirin ku heyeta dadgehê bi van biryarên xwe bêalîbûna xwe aşkere dike û ji ber van hemû sedeman em daxwaza redkirina heyeta dadgehê dikin.”
Piştî daxwaza Parêzer Rojhat Dîlsîz heyeta dadgehê navber da danişînê. Piştî navberê heyeta dadgehê daxwaza redkirina heyetê qebûl nekir û doz taloqî 8ê Îlonê kir.
Bertek nîşanî biryarên dadgehê dan
Piştî danişînê malbata Dîrîl û kesên tev li danişînê bûne li hember biryarên dadgehê daxuyanî dan çapemeniyê. Parêzerê malbatê, Parêzer Rojhat Dîlsîz got ku heya îro tu xwestekên wan nehatine qebûlkirin û wiha got: “Dadgeh dixwaze tenê kesekî weke sûcdar nîşan bide û serê buyerê bigire. Ev yek nayê qebûlkirin û divê sûcdarên buyerê werin darizandin. Ev dadgeh naxwaze buyerê zelal bike û em êdî dizanin ev heyeta dadgehê nikare vê buyerê zelal bike. Bila baş were zanîn ku li hember van biryaran bê deng namînin û em nabin şirîkî vê taritiyê.”
