Komelaya Çandê û Cemxaneya Pîr Sûltan Abdalê, Cema Miheremê pêkanî. Seroka Komelaya Pîr Sûltan Abdal a Amedê Ayfer Kendîr di cemê de axivî û got: “Cem ne tenê ibadetek e; di heman demê de meclîsa yekitiya civakî, razîbûn û heqîqetê ye.”
Komeleya Çandê û Cemxaneya Pîr Sûltan Abdal a Amedê, piştî rojiyên Miheremê, Cema Miheremê girêdan. Cema Miheremê ji aliyê Pîr ve bi xwendina gulgabangan dest pê kir, bi dirûşma “Rojiyên me yên Miheremê qebûl bin, yekitiya me herdemî be” loqmeyên aşûreyê hatin belavkirin. Gelek kes tev li cemê bûn.
‘Me Sêwas ji bîr nekir û em ê nedin jibîrkirin’
Seroka Komeleya Çandê û Cemxaneya Pîr Sûltan Abdalê a Amedê Ayfer Kendîr di cemê de axivî. Ayfer Kendîr di destpêka axaftina xwe de anî ziman ku ev der meydana heq e û got: “Canên ezîz, cem ne tenê ibadetek e; di heman demê de meclîsa yekitiya civakî, razîbûn û heqîqetê ye. Li ser vê bingehê, bila ibadeta me ne ji bo seyrê be, ji bo Heq be. Wekî ku hûn jî dizanin, 2yê Tîrmeha 1993yan şermezarî, tariya herî giran, bêşewq û herî mezin a dîroka me ye; her wiha rûreşiyeke welat e ku hîn jî nekewiye û baş nabe. Li Sêwasê 33 canên me di Madimakê de hatin şewitandin. Em hemû dizanin ku ev yek ji berê de bi awayekî plankirî û bernamekirî hatiye kirin. Ev 33 sal in ku lêgerîna me ya edaletê berdewam dike. Di vê lêgerîna edaletê ya ku bi cih nehatiye de me tu carî paşve gav neavêt û em ê paşve gav neavêjin jî. Me Sêwas ji bîr nekir û em ê nedin jibîrkirin.”
Piştî axaftinê, cem bi xwendina nefes û deyîşan bi dawî bû.
