Dadgeha Gelan a Rojava ku ji bo darizandina sûcên şer û sûcên li dijî mirovahiyê yên Dewleta Tirk ên li Bakur û Rojhilatê Sûriyeyê di roja duyemîn de berdewam dike.
Dadgeha li Zanîngeha Azad a Brukselê L’Université libre de Bruxelles di roja duyemîn de bi pêşkêşkirina delîlan destpê kir.
Dadgehê serê sibehê saet di 09:00-09:30an de Amadekariya roja 2yemîn kir. Saet di 09:30-10:30an de rûniştina 4emîn a Têkildarî sûcên Dewleta Tirk pêk hat. Saet di 10:50-12:30an de jî rûniştina 5emîn pêk hat.
Piştî nîvro jî Dadgeha Gel dê bi rûniştina 6an û axaftina dawî ya dozgeriyê, nirxandin rewşa hiqûqî ya Tirkiyeyê berdewam bike.
Sûcên şer
Di delîlên pêşkêşî dadgehê hatin kirin û daxuyaniyên hatin dayin de binpêkirinên mafên mirovan ên Dewleta Tirk ên yekser û neyekser ên bi destê komên xwe hatin nîşandan. Mişextkirina Kurdan ji Efrînê, guhertina demografiyaya herêmê, bombekirina sivîlên li ber bendavê û tinekirina binesaziyê li dadgehê bi berfirehî hate nirxandin. Di roja destpêkê de her wiha parêzerê Efrînî Îbrahîm Şêxo qala binpêkirinên mafên mirovan ên Dewleta Tirk ên li herêma dagirkirî kir. Şêxo diyar kir ku piştî dagirkirina Efrînê ji sala 2018an vir ve li 20 girtîgehên vekirî û veşartî bi hezaran kurd bêsebep têne girtin, sûcên weke destdirêjî, destavêtin, kuştin, talan, dizî û asîmîlasyonê hatin kirin.
Koçkirina bi zorê û guhertina demografiyayê
Parêzerê katalan Urko Azurtza li ser sûcên komkujiya etnîkî ya li GirêSpî û Serêkaniyê axivî û anî ziman ku Dewleta Tirk dest daniye ser mal û milkên gel, nifûsa xwecihî bi zorê koçber kiriye, bi armanca guhertina demografiyê jî kesên ji herêmên cuda li herêmê bi cih kiriye. Azurtza anî ziamn ku bombeya fosforê ya spî ya qedexekirî hatiye bikaranîn û ev sûc di raporên navneteweyî de hatine belgekirin.
