Amed – Hevserokê Federasyona Lêkolînên Îslamî ya Mezopotamyayê Abdullah Sagir derbarê konferansa 3yemîn a federasyonê de ku dê di 20-21ê Hezîranê de li Amedê bê lidarxistin de axivî û diyar kir ku mebesta konferansa wan ew e ku ji tiştên di nav civakê de diqewimin re bibin bersiv.
Federasyona Lêkolînên Îslamî ya Mezopotamyayê (MÎA-FED), bi hatina cem hev a sazî û pêkhatiyên sivîl û baweriyê yên cihêreng ên li herêmê, di Kanûna 2025an de hat avakirin. MÎA-FED dê di 20 û 21ê Hezîranê de li Eywana Alî Emîrî ya Şaredariya Bajarê Mezin a Amedê konferansa xwe ya sêyemîn li dar bixe. Konferansa ku dê du rojan berdewam bike dê saet di 09:00an de dest pê bike. Dê di dawiya roja duyemîn de jî encamname were parvekirin. Hevserokê MÎA-FEDê Abdullah Sagir derbarê konferansê de axivî.
‘Konferans bibe sedema serketina vê pêvajoyê’
Abdullah Sagir di destpêka axaftina xwe de qala armanca konferansê kir û wiha got: “Di serî de em dixwazin ji tiştên ku di nav civakê de diqewimin re bibin bersiv, em çareseriyekê ji wan ra bibînin. Salek û nîve pêvajoyek hatiye destpêkirin. Em dixwazin em jî alikariyê bidin vê pêvajoyê. Ev pêvajo îşelah dê bi piştgiriya gelê me bi ser bikeve. Em dixwazin ev pêvajo li gorî dil û hestê gelê me encam bibe. Em bi vê hêviyê nêzîkî vê pêvajoyê dibin. Hinek mijarên me jî di çarçoveya vê de tên nîqaşkirin, îşelah ew jî dê bibe wesîleya serkeftina vê pêvajoyê.”
Ji gelek welatan dê kes beşdar bibin
Abdullah Sagir di berdewamiya axaftina xwe de bal kişand ser naveroka konferansê û wiha bi lêv kir: “Me gelek mêvan vexwendine vê konferansê. Gelek axaftvan dê tev li me bibin. Ji Kurdistanê, Tirkiyeyê, ji Misrê, ji Bexdayê, ji Silêmaniyê, ji Hewlêrê û ji gelek bajaran wê axaftvanên me hebin. Her axaftvanek dê mijarekê bigire dest û ew ê mijara xwe ji me ra, ji beşdaran ra parve bikin. Roja ewil, di rûniştina yekem de çar axaftvanên me dê biaxivin. Piştî wê forûmek dê çêbibe. Di vê forûmê de kesên ku tev li bûne, dê nêrînên xwe û dîtinên xwe bibêjin. Rûniştina duyem dê piştî nîvro be. Di wê rûniştinê de jî sê axaftvanên me dê biaxivin û piştî re dîsa dê forûm dest pê bike.”
Di roja duyemîn de dê nirxandinên berfireh bên kirin
Abdullah Sagir diyar kir ku di dawiya roja duyemîn de dê nirxandinên berfireh werin kirin û wiha pê de çû: “Di roja duyemîn de, sê rûniştinên me hene. Di du rûniştinên ewil de dîsa sê kes dê biaxivin. Rûniştina dawî jî, em dibêjin foruma giştî, ê were lidarxistin. Ew jî nêzîkî saet û nîvekê bidome. Yanî di van du rojan da me çi bihîstiye, me çi dîtiye, em ê înşallah li ser rawestin. Ku rexneyên me hebin, em ê rexneyên xwe nîşan bidin û li gorî wê binirxînin. Piştî ku rûniştinên me xelas bûn, em ê encamnameyê bi gelê xwe ra parve bikin. Gotinên axaftvanan û nêrînên beşdaran em ê nîşe bigirin û piştî wê dema ku derfeta me çêbû, em ê çap bikin û bikin pirtûk.”
‘Banga tevlibûna konferansê hate kirin’
Abdullah Sagir ku em banga tevlibûnê li her kesê kir û axaftina xwe wiha bi dawî kir: “Em hemû gelê xwe, di serî de gelê Amedê, gelê Kurdistanê û gelê Tirkiyeyê vedixwînin vê konferansa me. Ev konferansa me îşelah ê hem feyde, hem sûdê di aliyê civakî û siyasî de bide me. Em bi vê hêviyê dixwazin û bang dikin ku beşdarên vê konferansê bibin, tevli me bibin, dilê xwe bidin dilê me ku em bi ser bikevin. Wekî tê zanîn serketin bi hevgirtinê çêdibe, bi destê hev girtinê çêdibe. Ku em bi hev ra meşiyan, em dest dan destê hev, mil dan milê hev, em bi hev ra tevgeriyan; em bawer in ku serketin ji me ra ye.”
