Amed – Hevserokê Şaxa OHDê ya Amedê Muhîttîn Mûgûç diyar kir ku peyamên Rêberê PKKê Abdullah Ocalan ji bo jiyaneke hevpar nexşe ye û wiha got: “Heke dewlet daxwaza aştiyê ya gelê Kurd nebîne û li gorî vê gav neavêje kes dewleta Tirk muxatab nagire Divê Tirkiye di qada navneteweyî de neyê naskirin û tune bê hesibandin.”
Şandeya ji parlamenterên DEM Partiyê Pervîn Buldan û Sirri Sureyya Onder pêk tê di 28ê Kanûna 2024an û 22yê Çile de li Girtîgeha Tîpa F ya Îmraliyê bi Rêberê PKKê Abdullah Ocalan re hevdîtin pêk anî. Şandeya Îmraliyê kurt be jî peyamên Rêberê PKKê Abdullah Ocalan bi raya giştî re parve kirin û peyaman di nava civakê de rê li ber hêviyên aştî, azadî û çareseriyê vekir. Herî dawî duh Hevserokê Giştî yê DEM Partiyê Tuncer Bakirhan di komcivîna partiya xwe de ragihand ku dê di demek nêzîk de Abdullah Ocalan ji bo çareseriya demokratîk a pirsgirêka Kurd bangeke dîrokî bike. Nûner û rêveberên rêxistinên sivîl ên demokratîk peyamên Abdullah Ocalan dinirxînin û piştevaniya peyaman dikin.
Hevserokê Komeleya Hiqûqnasên ji bo Azadiyê (OHD) a Şaxa Amedê Muhîttîn Mûgûç têkildarî hevdîtin û nêrînên Abdullah Ocalan ji Ajansa Welat re axivî. Muhîtîn Mûgûç di 1ê Sibatê de di 4emîn kongreya OHDa Amedê de wek hevserokê şaxê hat hilbijartin.
‘Peyam pir zelal e’
Muhîttîn Mûgûç diyar kir ku hevdîtinên ku bi Reberê PKKê Abdullah Ocalan re hatin kirin ji bo gelê Kurd û gelên Rojhilata Navîn girîng in û got: “7 xalên ku hatin parvekirin ji bo gelên Tirkiyeyê dê li ser vê axê çawa bi hevdû re hevpar bijîn wek nexşekê ye. Peyama ku hat parvekirin ji bo çareseriyê pir zelale lê divê Parlamentoya Tirkiyeyê jî bi zelalî wek qanûnî gavan biavêje û xwedî li pêvajoyê derkeve.”
‘Dewlet neçar e ku pirsgirêka gelê Kurd çareser bike’
Muhîttîn Mûgûç da zanîn ku pirsgirêka Kurd rastiyeke bi salan e û gelê Kurd êdî aştiyê dixwaze û wiha got: “Gelê Kurd çiqasî ji bo aştiyê destê xwe dirêj dike jî lê dewlet hê jî tu gav neavîtiye. Heke dewlet daxwaza aştiyê ya gelê Kurd nebîne û li gorî vê gavan neavêje kes dewleta Tirk muxatab jî nagire û dê di qada navneteweyî de neyê naskirin û tune bibe. Dewlet neçar e ku pirsgirêka gelê Kurd bi awayekî hiqûqî çareser bike.”
‘Divê nasnameya gelê Kurd bi awayekî hiqûqî bê naskirin’
Mûhîttîn Mûgûç bi bîr xist ku meseleya gelê Kurd meseleyek civakî, siyasî û hiqûqî ye û got: “Pênasekirina nasnameya gelê Kurd tune û nasname û pênasekirina gelê Kurd jî bi Tirkbûnê re dikin yek. Li gorî qanûnê dibên hemû kes Tirk in. Lê gelê Kurd vî tiştî qebûl nake û dibêje ji aliyê hiqûqî ve nasnameya me nehatiye naskirin. Daxwaza gelê Kurd a yekemîn jî bi awayekî hiqûqî naskirina nasnameya wan e. Heke bi gava yekemîn bi awayekî hiqûqî pêk neyê baweriya kesekî ji bo çareseriyê dewletê çênabe. Ji ber ku di salên 2013-2015an de kesên ku di ‘pêvajoya çareseriyê’ de cih girtin hemû hatin darizandin. Di vê çarçoveyê de divê ewilî navê vê pêvajoyê bi awayekî hiqûqî bê pênasekirin. Paşê bi awayekî qanûnî divê parêzerên birêz Ocalan dikaribin pê re dest bi hevdîtinan bikin.”
‘Divê partiyên siyasî piştgiriyê bidin pêvajoyê’
Muhîttîn Mûgûç da zanîn ku ji bo pêvajoyeke çareseriyê hevdîtinên bi partiyê siyasî re hatin kirin girîng e û wiha axivî: “Ji bo pêvajoyeke çareseriyê divê partiyên siyasî bi zelalî nêzîkî pirsgirêka Kurd bibin û piştgiriyê bidin pêvajoya hevdîtinên bi birêz Ocalan re. Heke piştgiriyê nedin jî divê nebin asteng. Armanca saziyên sivîl jî jixwe ew e ku ji bo çareserkirina pirsgirêkên di nav gel û pergalê de bibin pir. Divê ji her aliyê ve çi bikeve ser milên saziyên sivîl û partiyên siyasî bikin û xwedî li vê pêvajoyê derkevin.”
‘Divê di destûra bingehîn de nasnameya gelê Kurd bê naskirin’
Muhîttîn Mûgûç diyar kir ku ew wek OHDe piştgiriyê didin pêvajoyê û dixwazin ev pêvajo ji aliyê rê û rêbazan ve bi zelalî bê diyarkirin û wiha dawî li axaftina xwe anî: “Daxwaza me ew e ku di destûra bingehîn de nasnameya gelê Kurd bê naskirin. Heke ku nasnameya gelê Kurd wek qanûnî bê naskirin, em jî wek OHDê ji aliyê hiqûqî ve ji bo avakirina destûra bingehîn ku pêşerojê were amadekirin dixebitin. Pêşniyarên çawa bên kirin, em li ser wan bixebitin. Em hêvî dikin ku ev pêvajo bibe sedama aştî û azadiyê.”
