Welatiyên Amedî yên pêvajoya “Aştî û Civaka Demokratîk” nirxandine, destnîşan kirin ku heta Rêberê Gelê Kurd Abdullah Ocalan azad nebe ew ê ji pêvajoyê bawer nakin û xwestin qanûn bên çêkirin.
Nîqaşên têkildarî pêvajoya “Aştî û Civaka Demokratîk” ku Rêberê Gelê Kurd Abdullah Ocalan di 27ê Sibata 2025an de da destpêkirin, wekî rojeva sereka ya bakurê Kurdistanê û Tirkiyeyê berdewam dikin. Ligel ku Rêberê Gelê Kurd Abdullah Ocalan û Tevgera Azadiya Kurdistanê ji bo çareseriyê gavên dîrokî avêtine jî hêj dewleta Tirk li beramberî gavên hatine avêtin gav neavêtin, berovajî vê berpirsariya xwe bi cih neaniye. Ji van gavan a herê girîng jî statûya hiqûqî ya sermuzakerevanê pêvajoyê Rêberê Gelê Kurd Abdullah Ocalan e. Gavneavêtina Tirkiyeyê dibe sedema nîqaşên xetimîna pêvajoyê û bêbaweriya civakê ya li hember pêvajoyê kêm dike.
Welatiyên Amedî derheqê pêvajoya “Aştî û Civaka Demokratîk” û azadiya fizikî ya Rêberê Gelê Kurd Abdullah Ocalan de axivîn.
‘Divê Serok Apo azad be’
Welatiyên Amedî bi bîr xistin ku tevî PKKê xwe fesx kir, agirbest îlan kir, hêzên xwe ji Bakur û Tirkiyeyê kişandin jî dewleta Tirk hêj qanûnek dernexistiye. Welatiyan anîn ziman ku dewlet dixwaze Qendîlê vala bike û ev tişt gotin: “PKKê û Serok Apo gelek gavên birûmet avêtin. Em bi Serok Apo pir bawer in lê em ji dewleta Tirk ne bawer in. Çand sal berê divê Serok Apo azad bibûya. Bahçelî got, ‘Bila were Meclisê biaxive.’ Heta Serok Apo azad nebe, em tu caran ji pêvajoya aşitiyê bawer nakin. Divê Serok Apo azad bibe, divê Tirkiye di qanûnan de zimanê gelê Kurd, mafê gelê Kurd, eyaleta Kurdistanê, federalîzma Kurdistanê qebûl bike.”
‘Bila mafê Kurdan ê heqîqetê bidinê’
Amediyan anîn ziman ku divê dewleta Tirkiyeyê gavên rast biavêje û wiha gotin: “Pêvajoya aşitiyê ji Kurdan dest pê nake. Pêvajoya aşitiyê ji hikûmetê dest pê dike. Hikumet mafên Kurdan bi awayekî dirûst bide wan, ew çax pêvajoya aşitiyê ye.” Amediyan diyar kir ku ji bo pêvajo bimeşe divê di serî de girtî bên berdan û gotin: “Madem ku daxwaza bingehîn ev e wê demê hemû girtiyan berdin. Selahattîn Demîrtaş û wan berdin bila ew jî siyaseta xwe bike. Em dixwazin desthilatdar karê xwe bike.”
