Foruma Aştiyê ya Îzmîrê, îsal cara 2yemîn çalakiya firofirokan li ser navê Sirri Surreya Onder li Baxçeya Gulan a li Kulturparkê li dar xist.
Di çalakiya ku ji aliyê Foruma Aştiyê ya Îzmîrê ve cara duyemîn hat lidarxistin de, zarokan firofirok firandin û beşdarî nîşandana sêrbaziyê bûn. Di çalakiyê de pankarta “Bêyî ku em kesî li pişt xwe bihêlin, aşitî” hat vekirin û bi beşdariya girse ya zarokan gelek şahiyên din hatin lidarxistin. Çalakî bi govend û stranan berdewam kir; her wiha gelek rêxistinên demokratîk, parlamenterê Îzmîrê yê Partiya Demokrasî û Wekheviya Gelan (DEM Partî) İbrahim Akın û keça Sirri Surreya Onder, Ceren Onder Kandemîr jî beşdar bûn û axivîn.
‘Dîtina navê bavê min li gel peyva firofirokê gelekî biwate ye’
Ceren Onder Kandemîr, spasiya hemû kesên ku ev çalakî amade kirine û beşdar bûne kir û got: “Hevdîtinên herî zêde ku ez bavê xwe tê de dibînim hevdîtinên wiha ne. Ji ber ku mirov dikare bi hêsanî navê kesekî bide saziyeke fermî, dikare wî di nava betonê de bihêle, bike peyker. Heke hûn bala xwe bidinê, lîsteyeke protokolan a wisa heye ku di tu tiştî de naguhere; ew li her derê tên vexwendin û diçin her derê. Lê di wan salonên konferansê de, di wan panelan û navendên çandê de tu tiştekî wisa nayê axaftin. Mirov tenê ji neçarî tên, tenê ji bo ku xwe nîşan bidin li wir amade dibin û piştre diçin. Lê belê, wekî di van şahiyên firofirokan de, di van parkan de, an jî wekî sînemaya li hewaya vekirî ya ku me îsal bi Karkerên Vegerandinê yên Stenbolê re çêkir… Ez di van deman de girîngî û guhertina rêbaza bibîranîna mirovekî fam dikim. Ez hîs dikim ku di demên wiha de em bîranîneke rast û dirust dikin. Ji ber vê yekê dema hatim vexwendin ez gelekî kêfxweş û bi kelecan bûm. Yanî, dîtina navê bavê min li gel peyva firofirokê jî ez gelekî bextewar kirim. Ji bo me xwedî wateyeke pir mezin e. Gelekî spas dikim. Yanî ne gewr e, kesk e. Ji ber wê jî gelekî, gelekî bi wate ye.”
‘Mîrata Onder ji bo me pir hêja ye’
Piştî wê, parlamenter Îbrahim Akin axivî û da zanîn ku mîrata ku Sirri Sureyya Onder li pey xwe hiştiye pir biqîmet e û got: “Mîrata ku wî li pey xwe hiştiye bi rastî jî mîrateke bêhempa ye. Ew yek ji wan kesên kêmpeyda dibû bû ku dikaribû bandorê li her kesî bike, pêwendiyê bi her kesî re deyne û bi vî rengî, bi têkiliyên cuda yên civakî her kesî li dora ramanên xwe bicivîne. Ji ber vê yekê ez wî bi rêzdarî bi bîr tînim. Ez difikirim ku di warê şiyana nûnertiya partiya me ya li Tirkiyeyê de, di warê hewldana ku nîşan daye û di warê keda ku daye aştiyê de, xwedî cihekî nayê jibîrkirin û di heman demê de cihekî ku nayê dagirtin e.”
