Baroya Îzmîrê, bal kişand ser rewşa girtiya nexweş Tugcenur Ozbay a ku li Girtîgeha Şakranê li dijî ferzkirina nasnameyê di rojiya birçîbûnê de ye û ev bang li rayedaran kir: “Rîska ku jiyana xwe ji dest bide gelekî mezin e, bikevin tevgerê.”
Baroya Îzmîrê derbarê rewşa girtiya bi navê Tugcenur Ozbay a ku li Girtîgeha Jinan a Şakranê li dijî ferzkirina nasnameyê û binpêkirina mafan di rojiya birçîbûnê ya bêsînor de ye, daxuyaniyek da. Baroya Îzmîrê destnîşan kir ku li Girtîgeha Jinan a Şakranê, ji meha Kanûna 2025an vir ve ferz kiriye ku girtî her gav nasnameya girtîgehê bi xwe re bigerînin. Baroyê diyar kir ku mafên bingehîn ên girtiyên ku nasnameyê ranekin, wekî çûyîna revîr û nexweşxaneyê, hevdîtina bi malbat û parêzeran re û wergirtina pirtûk û nameyan tê astengkirin.
Di daxuyaniyê de hat gotin ku Tugcenur Ozbay li dijî vê sepana keyfî dest bi rojiya birçîbûnê ya bêsînor kiriye, di roja 127an de giraniya wê daketiye 43 kîloyan û jiyana wê di bin rîskeke mezin de ye. Daxuyanî ji aliyê Serokê Baroya Îzmîrê Sefa Yılmaz û Endama Desteya Rêveber a Berpirsa Komisyona Girtîgehan a Baroyê Ceren Şen Tosun ve hat xwendin.
‘Li Girtîgeha Şakranê ya Jinan sepanên kêfî û dijhiqûqî hene’
Ceren Şen Tosun da zanîn ku rêveberiya girtîgehê bi xwe re gerandina nasnameyê li ser girtiyên jin ferz kiriye û got: “Li ser daxwaza bi israr a parêzeran û serlêdanên Baroya Îzmîrê, ev meh û nîvek e ku astengiya li ser hevdîtina parêzeran hatiye rakirin û girtî tenê dikarin parêzerên xwe bibînin. Rêziknameyên qanûnî yên li ser karta nasnameya girtiyan tenê bi cezayên dîsîplînê sînordar in û naveroka kartan jî bi rênîşandanan hatiye diyarkirin. Li Îzmîrê û li seranserê Tirkiyeyê di gelek girtîgehan de ji ber hilgirtina nasnameyê tu pirsgirêk dernakevin, lê li Girtîgeha Jinan a Şakranê ji ber sepanên kêfî û derhiqûqî rojiya birçîbûnê ya bêsînor dest pê kiriye. Ji bo ku destwerdana di maf û azadiyên bingehîn de li gorî hiqûqê be, divê armanceke wê ya rewa hebe; her wiha divê ev rêbaz li gorî armancê guncan, pêwîst û bi pîvan be.”
‘Tugcebur daketiye 43 kîloyan, erka xwe bi cih bînin’
Piştre Ceren Şen Tosun diyar kir ku rêveberiya girtîgehê cezayên dîsîplînê yên veşartî û yên ku di qanûnê de cih nagirin, bi awayekî derhiqûqî bi kar tîne û got: “Ev sepana li Girtîgeha Jinan a Şakranê ku bi prensîba dewleta hiqûqê re li hev nake, li dijî rûmeta mirovahiyê ye. Ev rewş mafê jiyanê, qedexeya muameleya xirab, mafê darizandina adil û qedexeya cudakariyê binpê dike. Ji ber van kiryarên derhiqûqî û neusûlî, Tuğçenur Ozbay ketiye rojiya birçîbûnê ya bêsînor û îro di roja 127an de ye. Kîloya wê nêzî 43yan bûye û rîska ku jiyana xwe ji dest bide gelekî mezin e. Wek Baroya Îzmîrê, ji bo ku di girtîgehan de tu mirin çênebin, şert û mercên înfazê li gorî yasa û hiqûqê bin û ev pirsgirêk bên çareserkirin, me serî li sazî û dezgehên peywendîdar da. Ji bo ku ev serlêdan encam bigirin û girtî di rojiya birçîbûnê de jiyana xwe ji dest nedin, divê hem civaka sivîl hem jî saziyên rayedar û berpirsyar bikevin tevgerê.”
