Baroya Îzmîrê li nexweşxaneyê çû serdana Mehmet Saît Yildirim û da zanîn ku girtiyê nexweş Mehmet Saît Yildirim li ser nivîna nexweşxaneyê hatiye kelepçekirin û baroyê diyar kir ku tevî qedandina cezayê xwe 21 meh in tehliyekirina wî tê astengkirin û banga serbestberdana lezgîn kir.
Baroya Îzmîrê bi daxuyaniyek ragihand ku heyeta ku ji Endamê Rêveberiya Baroyê parêzer Arîf Çinar Evrîm û endamên Komîsyona Girtîgehê parêzer Fatma Demîrer û parêzer Nehîr Bîlece pêk tê, ji bo ku rewşa Mehmet Saît Yildirim li cih tespît bike serdana nexweşxaneyê kir. Di hevdîtinê de hatiye dîtîn ku Mehmet Saît Yildirim ku bi nexweşiyên KOAH, hîpertansiyon û dil-damar re têdikoşe. Di dilê wî de du stent hene. Tevî vê tabloya tenduristiyê ya giran û metirsîdar, li ser nivîna nexweşxaneyê hatiye kelepçekirin.
‘Cezayê îdamê yê li ser kaxizê hatiye rakirin, veguheriye îdameke demdirêj’
Baroyê bal kişand ser şert û mercên girtîgehan û wiha got: “Cezayê îdamê li ser kaxizê hatiye rakirin lê girtiyên nexweş bi kelepçe, bitaloqkirin û bêtedawîkirinê li girtîgehan girtîne û ev yek cezayê îdamê ya demdirêj e. Li ser nivîna nexweşxaneyê kelepçekirina girtiyekî, li dijî rûmeta mirovahiyê ye.”
21 meh in tehliyekirina wî tê astengkirin
Baroyê da zanîn ku Mehmet Saît Yildirim 30 sal cezayê xwe qedandiye, lê belê bi biryarên Lijneya Îdare û Çavdêriyê 21 meh in tehliyekirina wî tê astengkirin û destnîşan kir ku cihgirtina van lijneyan li şûna dadgehan û dayîna biryarên ku dibin sedema dirêjkirina cezayê kesan, bi serê xwe bêhiqûqiyeke mezin e.
‘Tehliye ne daxwaz e, erka hiqûqî ye’
Baroya Îzmîrê di dawiya daxuyaniya xwe de banga serbestberdana lezgîn kir û ev peyam da: “Ji bo parastina mafê jiyanê yê Mehmet Saît Yildirim divê demildest bê berdan; ev ne tenê daxwazek e, erka hiqûqî ye. Weke Baroya Îzmîrê em ê ji bo jiyaneke bi rûmet têkoşîna xwe bidomînin.”
