Dayikên Şemiyê di hefteya 1036emîn de li aqûbeta Bedîrhan Tuysuz pirsîn û gotin: “Lêpirsînek bi bandor ku dê aqûbeta Bedîrhan Tuysuz eşkere bike. Çiqas sal derbas bibin jî em ji bo Bedîrhan Tuysuz û hemû windahiyên xwe edaletê dixwazin.”
Dayikên Şemiyê/Mirovên Şemiyê her hefte li Qada Galatasarayê kom dibin û aqûbeta xizmên xwe yên di bin çavan de hatin windakirin û hatin qetilkirin dipirsin. Dayikên Şemiyê/Mirovên Şemiyê li Qada Galatasarayê bi qurnefîlên di destên xwe de û wêneyên windayan kom bûn û di hefteya 1036an de çalakiya xwe berdewam kirin. Parlamenterê DEM Partiyê yê Rihayê Ferît Şenyaşar, nûnera TÎHVê ya Stenbolê Ûmît Efe û gelek kes tevlî çalakiyê bû.
Dayikên Şemiyê, di çalakiya vê hefteyê de aqûbeta Bedîrhan Tuysuz ê ku di sala 1979an de li gundê Kiliçin ê navçeya Curnê Reş a Rihayê ji aliyê cerdevanên girêdayî Eşîra Bucak ve hate revandin pirsîn. Ûmît Efe diyar kir ku di dawiya salên 1970î de li Curnê Reş ku êrîş û mirin lê pêk dihat, rewşeke tund û tûj hebû û wiha got: “Nadîr Temel ê ku di 6ê Gulana 1979an de di hilbijartinê de weke namzetê serbixwe yê şaredariyê bû bi ser ket. Bi vî awayî Curnê Reş bû şaredarê yekemîn a ku siyaseta kurd bi dest xist. Piştî hilbijartinan li Curnê Reş rewşa tundûtûjiyê hîn xerabtir bû. Mehmet Celal Bucak, endamê Partiya Edaletê ya wê serdemê, di heman demê de serokê baskê Eşîra Bucak bû ku bi sedan çekdarên wê hebûn û bi dewletê re hevkarî dikirin. Îdîayên cidî yên ku bi kontrgerîla û operasyonên taybet re di nava têkiliyên nêz de ye hebûn.”
Umît Efe da zanîn ku eşîrên li Rihayê ne bi Bucak re bûn dibûn hedefa Bûcakan û wiha axivî: “Bedîrhan Tuysuz ên ku li Sîwereg û Curnê Reş bi cih bûne yek ji van eşîran in. Bedîrhan Tuysuz kesekî ku li gund bi çandiniyê re mijûl dibû û di derdora xwe de jê dihat hezkirin û rêzgirtin. Di Mijdara 1979an de bi sedan çekdarên Hakî Bucak ê ku ji Eşîra Bucakan e, bi ser gund de girt. Kurê Bedîrhan Tuysuz ê 13 salî û hevjîna wî rehîn girtin. Ji Bedîrhan Tuysuz re peyam şandin û gotin ‘Malbata te li vem me ye, bê em biaxivin’. Li ser vê yekê Bedîrhan Tuysuz hat cihê bûyerê, lê bi zorê ew xistin wesayîtê û ew revandin. Malbatê demildest serî li cendirme û qeymeqamtiyê da û xwest kurê wan ê revandî bê dîtin. Li ser îdiayên malbatê bi taybetî ku Bedîrhan Tuysuz li gundê Sogûtlu ya Bucakê bi darê zorê hatiye binçavkirin, lêpirsîn nehat vekirin. Di encamê de serlêdanên malbatê nehatin şopandin.
Lêpirsînek bi bandor ku dê aqûbeta Bedîrhan Tuysuz eşkere bike. Ji bo daxwaza Malbata Tuysuz a ‘Bila gorekî wî hebe’ bi cih bînin. Çiqas sal derbas bibin jî em ji bo Bedîrhan Tuysuz û ji bo hemû windahiyên xwe edaletê dixwazin. Divê dewlet li gorî pîvanên hiqûqa gerdûnî tevbigere.”
Dayikên Şemiyê piştî daxuyaniyê qurnefîl danîn qadê û belav bûn.
