Amed – Hevseroka DEM Partiyê ya Amedê Gulşen Ozer, Hevseroka DBPê ya Amedê Rûçem Vefa Elyakût û aktivîsta TJAyê Arzû Karaman ji bo meşa “Gavek ji bo aştiyê” ku dê di 16ê Gulanê de li Amedê bê lidarxistin banga tevlibûnê kir û gotin: “Werin em bi hev re li aştiyê xwedî derkevin û ji bo aştiyê û azadiya fizîkî ya Abdullah Ocalan dengê xwe bilind bikin.”
DEM Partî, di çarçoveya pêvajoya Aştî û Civaka Demokratîk de ji bo avêtina gavan a dewletê û çêkirina qanûnan dest bi çalakiyên “Gavek ji bo aştiye” dike. DEM Partî ji bo daxwazên gel bi cih werin û ji bo pêşvebirina pêvajoyê qanûnên pêwîst bên çêkirin li bajarên Bakurê Kurdistanê û Tirkiyeyê dê di vê çarçoveyê de meşên girseyî li dar bixe. Li bajarên Bakurê Kurdistanê û Tirkiyeyê ji bo tevlibûna gel a pêvajoyê daxwazên hevpar a gelan dê bi rêya vê çalakiyê li qadan bê destnîşankirin. Aktivîsta TJAyê Arzû Karaman, Hevseroka DBPê ya Amedê Rûçem Vefa Elyakût û Hevseroka DEM Partiyê ya Amedê Gulşen Ozer, derbarê meşa ku dê di 16ê Gulanê de saet di 19:00an de ji ber Zindana Amedê ya li navçeya Rezanê heta ber Plazaya AZC ya Ofîsê bê lidarxistin, banga tevlibûna meşê kir.
‘Werin em xwedî li aştiyê derbikevin’
Arzû Karaman bi bîr xist ku li ser banga Devlet Bahçelî, Rêberê Gelê Kurd Abdullah Ocalan pêvajoya Aştî û Civaka Demokratîk dest pê kir û got: “Em mêze dikin ev sal û nîve ji aliyê dewlet û hikûmetê ve gav nehatiye avêtin. Divê êdî hin tişt şênber bibin. Hêviya gel ji vê pêvajoyê çêbû û gel xwedî li vê pêvajoyê derket. Daxwaza jinan, ciwanan û hemû gelan ew e ku azadiya birêz Abdullah Ocalan pêk bê û di şert û mercên baş de pêşengtiya vê pêvajoyê bike. Ji ber vê yekê jî me biryara meşê girt. Ji bo aştiyê gavek bê avêtin em ê di 16ê Gulanê de bimeşin. Em ê weke jin pêşengtiya vê meşê bikin, werin em xwedî li aştiyê derbikevin û azadiya fizîkî ya birêz Abdullah Ocalan pêk bînin.”
‘Werin em bi hev re ji bo aştiyê gavekê biavêjin’
Hevseroka DBPê ya Amedê Rûçem Vefa Elyakût jî da zanîn ku ev zêdetirî salekê ye pêvajoya “Aştî û Civaka Demokratîk” dimeşe û ketiye qonaxeke nû û wiha axivî: “Di vê pêvajoyê de çi berpirsyarî ket li ser milê Tevgera Azadiyê bi cih anî. Lê hêj jî ji aliyê dewlet û hikûmetê ve gav nehatiye avêtin. Hêviya gel ji Rêberê Gelê Kurd Abdullah Ocalan heye. Daxwaza Gelê Kurd ew e ku divê êdî gavên hiqûqî bên avêtin û statuya Rêberê Gelê Kurd zelal bibe. Kesên ku pêşeroja xwe dixwazin, şer naxwazin, azadî û aştîxwaz divê 16ê Gulanê de saet 19:00an de werin em bi hev re ji bo aştiyê gavekê biavêjin.”
‘Werin em dengê xwe bilind bikin’
Hevseroka DEM Partiyê ya Amedê Gulşen Ozer jî destnîşan kir ku piştî banga Rêberê Gelê Kurd Abdullah Ocalan dewletê hê jî gaveke berbiçav neavêtiye û got: “Sermuzekerevanê vê pêvajoyê birêz Abdullah Ocalan e. Îro di nava çar dîwaran de hê jî şert û mercên wî rast nebûye. Hemû gel daxwaz dikin ku birêz Ocalan azad bibe. Li ser vê bingeha aştiyê ku em dibejin em ê ava bikin, em dixwazin dewlet jî demildest gavên hiqûqî biavêje. Yên ku aştiyê dixwazin bila di 16ê Gulanê de werin em bi hev re dengê xwe bilind bikin û daxwaza aştiyê bikin, daxwaza azadiya fizîkî ya Abdullah Ocalan bikin.”
