Parêzerê Doza Hurmuz Dîrîl ku 6 sal berê li Elkê hatibû windakirin taloqî 2yê Tîrmehê hat kirin. Parêzer Rojhat Dîlsîz di danişînê de got ku gumana wî heye ku ev doz jî weke ya Gulistan Dokû be.
Danişîna 2yemîn a doza Hurmuz Dîrîl ê ku 11ê Çileya 2020an hatibû windakirin li 1emîn Dadgeha Cezayên Giran a Şirnexê bi tevilbûna malbata Dîrîl, parêzerên malbata Dîrîl, parêzerên endamên OHDê, rêveberên ÎHDê, Parlementerê DEM Partiyê yê Şirmex Mehmet Zekî Îrmez hate lidarxistin. Apro Dîrîl ê ku ji dozê girtî ye û li Girtîgeha Tîpa Tyê ya Şirnex tê girtin û fermandarê pispor Ahmet Taşdemîr bi rêya SEGBÎSê tev li danişînê hatin kirin.
Di destpêka danişînê de heyeta dadgehê mafê axaftinê da Apro Dîrîl. Aprol Dîrîl got ku ew gotinên xwe yên dozgeriyê dubare dike.
Piştî vê yekê keça Hurmuz Dîrîl ji heyeta dadgehê xwest ku çend pirsan ji frrmandarê pispor Ahmet Taşdemîr bike.
Li ser pirsên keça Hurmuz Dîrîl, Ahmet Taşdemîr wiha axivî: “Beriya niha min gotibû 4 cerdevan çûne gundê Mêhrê û çek xistine bin erd. Ev cerdevan bêyî ku destûrê bixwazin û bêyî ku bi awayek fermî peywir bistînin çûne gundê Mêhrê û li ser vê yekê gelek guman li gel min çêbûn. Derbarê buyerê de ez dikarin van gotinan bibêjim.”
Piştî axaftina Ahmet Taşdemîr, parêzerê malbata Dîrîl, Rojhat Dîlsîz axivî û daxwazên xwe ji heyeta dadgehê re anî ziman.
‘Dişibe doza Gulistan Dokû’
Rojhat Dîlsîz di axaftina xwe de diyar kir ku li ser bûyera windakirina malbata Dîrîl gelek gumanên wî hene û wiha axivî: “Beriya niha me nivîskî daxwazên xwe gotibûn lê ji aliyê dadgehê ve nehatin qebûlkirin. Ji doza Gulistan Dokû jî diyar e ku dixwazin ser vê dozê jî bigirin. Di vê dozê de kesên ku hêza dewletê li pişt xwe dibînin hene û li gor axaftinên faîlan eşkere ye ku Apro Dîrîl tena serê xwe nikare van kuştinan pêk bîne.”
Rojhat Dîlsîz di berdewama axaftina xwe de qala axaftinên telefona Apro Dîrîl kir û wiha berdewam kir: “Qeydên axaftinan hene û di van qeydan de Apro Dîrîl dibêje kesê bi navê Nazdar Hamo (Sabrî Bûlût) divê dewlet li min xwedî derkeve. Em dixwazin Nazdar Hamo (Sabrî Bûlût) were guhdarîkirin û em bizanin Sabrî Bûlût kî ye? Her wiha Apro Dîrîl bi Îsmaîl Yildiz re jî diaxive û Îsmaîl Yildiz jê re dibêje ‘Kemal ê bi dozger re biaxive û dê te xelas bike’ ev Kemal li gor tê zanîn xebatkarê Îstîxbarata Şirnexê e û divê were eşkerekirin ku Kemal kî ye?”
Rojhat Dîlsîz herî dawî daxwaz kir ku dîmenên balefirên keşfê yên wê demê jî bikevin dosyeyê.
Li ser daxwazên Rojhat Dîlsîz heyetê navber da danişînê û piştî navberê heyeta dadgehê doz taloqî 2yê Tîrmehê kir. Her wiha heyeta dadgehê biryar da ku di 8ê Hezîrana 2026an de biryarê li ser daxwazên Rojhat Dîlsîz bide.
