Rêxistina Mafên Mirovan a Îranê (ÎHR) ragihand ku ji destpêka meha Gulanê û vir ve 5 ciwanên ku tevlî çalakiyên xwepêşandanê bûne hatin darvekirin.
Rêxistina Mafên Mirovan a Îranê derbarê rewşa dadgehên di bin desthilatdariya rejîma Îranê de raporek weşand.
Di raporê de hat ragihandin ku tenê ji serê meha Gulana ya îsal, pênc ciwanên beşdarî xwepêşandan û çalakiyên nerazîbûnê yên li bajarên Urmiye, Îsfehan, Zahîdan û Şîrazê bûne, li ser bingeha îtîrafên bi darê zorê, hatine darvekirin.
Her wiha hat destnîşankirin ku dezgeha dadweriyê ya Îranê serxwebûna xwe winda kirine. Dadgehên Şoreşê rasterast di bin çavdêriya Wezareta Îstîxbarata Îranê de tevdigerin û parastina rejîmê li ser milê wan e. Darizandin bi lezeke pir mezin tên dawîkirin, cezayên giran li girtiyên siyasî tên birîn. Ev dadgeh tenê li ser bingeha îtîrafên bi zorê û êşkenceyê hatine girtin biryara darvekirinê didin.
Rêxistinê da zanîn ku darizandin tenê çend deqîqeyan berdewam dike, parêzerên serbixwe qedexe ne û bêyî parastina parêzeran ceza li girtiyan tê birîn.
Ev kiryar binpêkirineke eşkere ya mafên mirovan û xala 10emîn a Zagonên Gerdûnî ya Mafên Mirovan e. Rejîma Îranê dezgeha dadweriyê wekî amûrekê ji bo tirsandina civakê bi kar tîne û de pirsgirêkên qanûnî yên din ên xelkê tên piştguhkirin.
