Amed – Welatiyên Amedî li ser pêvajoya heyî axivîn û bal kişandin ser gav navêtinên dewletê. Welatiyan destnîşan kirin ku heta statuya Rêberê Gelê Kurd Abdullah Ocalan neyê naskirin ev pirsgirêk çareser nabin û gotin: “Aştî bi vîna gel û Rêbertiya wê pêkan e.”
Pêvajoya “Aştî û Civaka Demokratîk” a bi banga 27ê Sibata 2025an a Rêberê Gelê Kurd Abdullah Ocalan hatiye destpêkirin nêzî sal û nîv li pey xwe hişt. Di vê pêvajoyê de Rêberê Gelê Kurd Abdullah Ocalan û Tevgera Azadiyê ya Kurd gelek gav avêtin. Tevî vê yekê ji bilî avakirina Komîsyona li Meclisê dewleta Tirkiyeyê hêj gaveke şênber neavêtiye. Rêveberiya Tevgera Apoyî di salvegera yekemîn a kongreya fesixkirina PKKê de li ser rewşa dawî ya Pêvajoya “Aştî û Civaka Demokratîk” li Herêmên Parastinê yên Medyayê civîneke çapemeniyê li dar xist. Rêveberiya Tevgera Apoyî di civînê de diyar kir ku divê gavên hiqûqî bi lez bên avêtin, Rêberê Gelê Kurd Abdullah Ocalan muxatabê fermî bê dîtin û statuya wî bê diyarkirin.
Li Amedê jî di rojeva gel de pêvajo û nîqaşên ser pêvajoyê her diçe zêde dibin. Gelê Amedê ji ber gav neavêtinên dewletê bi bertek in û ev yek di nav gel de bê baweriyekê derdixe holê. Welatiyan diyar kirin ku heta statuya Rêberê Gelê Kurd Abdullah Ocalan neyê naskirin û gavên şênber neyên avêtin pêvajo bi sernakeve. Welatiyên Amedî pêvajoya heyî ji ajansa me re nirxandin.
Welatiyan da zanîn ku hikumetê heta niha tenê gotinan dibêje lê di pratîkê de tu guhertin çênabin. Welatiyan anî ziman ku gelê Kurd êdî naxwaze bi gotinên vala were xapandin û daxwaza polîtîkayeke rasteqîn dike.
‘Aştî bi vîna gel û Rêbertiya wê pêkan e’
Welatiyan li ser statu û azadiya Rêberê Gelê Kurd dane zanîn ku ya herî girîng statûya Rêberê Gelê Kurd e û dîsa muxatabê sereke yê aşitiyê Abdullah Ocalan e û wiha gotin: “Heta ku statuya Rêberê Gelê Kurd Abdullah Ocalan neyê naskirin ev pirsgirêk çareser nabin. Aştî bi vîna gel û Rêbertiya wê pêkan e.”
‘Heke gav neyên avêtin wê pêvajo bixitime’
Welatiyan li ser neavêtina gavan anî ziman ku heke gav neyên avêtin wê rewş xirabtir bibe, dê sebra gel namîne, pêvajo bixitime û heviya ji bo çareseriyê jî dê nemîne.
