Enqere – Endamên Meclisa Ciwanan ên DEM Partiyê diyar kirin ku ew ê ji bo azadiya fizîkî ya Rêberê Gelê Kurd Abdullah Ocalan li Kurdistan û Tirkiyeyê xebatan bidin pêş xwe û gotin: “Bêyî azadiya Serokatiyê aştî pêk nayê.”
Meclisa Ciwanan a DEM Partiyê, civîna xwe a mehane li dar xist. Di civînê de ciwanan li ser xebatên xwe yên mehekê ku dê bidin pêş xwe, rawestiyan. Ciwan dê di çerçoveya pêvajoya Aştî û Civaka Demokratîk de li bakurê Kurdistanê û Tirkiyeyê xebatan li dar bixin. Ciwan, dê li dijî polîtikayên bişaftin, şerê taybet û pergala modernîteya kapîtalîst dest bi rêxistinkirina ciwanan bikin. Yek jî mijara herî girîng a civînê azadiya fizîkî ya Rêberê Gelê Kurd Abdullah Ocalan bû. Meclisa Ciwanan a DEM Partiyê jî bi daxuyaniyekê daxwaza xwe ya hevdîtina bi Rêberê Gelê Kurd Abdullah Ocalan re ragihandin. Her wiha ciwanan ragihand ku ji bo azadiya fizîkî ya Rêberê Gelê Kurd Abdullah Ocalan li her derê xebatan bidin pêş xwe.
Endamên Meclisa Ciwanan ên DEM Partiyê, tekildarî xebatên dê li darbixînin û azadiya fizîkî ya Rêberê Gelê Kurd Abdullah Ocalan axivîn.
‘Em ê jinên civan birêxistin bikin’
Ji endama Meclisa Ciwanan Ruken Arvasê bi lêv kir ku weke Meclisa Ciwanan di civînê de li ser rêxistinkirina jinên ciwan jî dê xebatan bidin pêş xwe û wiha axivî: “Em jinên ciwan di serî de ji bo azadiya Rêber Apo hatin gel hev. Taybet jî em dixwazin biçin Girava Îmraliyê û bi Serok Apo re hevdîtinê bikin. Weke jinên ciwan em dixwazin ji vê yekê re pêşengtiyê bikin. Her wiha li dijî şerê taybet, polîtikayên li ser jinan, weke jinên ciwan em dikarin çi bikin û li ser rêxistinkirina jinên ciwan em ê xebatan bidin pêş xwe. Em ê di nava civakê de ji bo jinên ciwan hevdîtin, kargeh û civînan li darbixînin. Ji bo jinên civan pêşengiyê bikin û di nava civakê de bi rol û misyona xwe rabin. Xebatên me hem li Kurdistanê û hem jî li Tirkiyeyê berdewam bikin.”
‘Ji bo pêvajo bigihije encamê divê Serokatî azad bibe’
Di berdewama axaftina xwe de Ruken Arvasê destnîşan kir ku bêyî azadiya fizîkî ya Rêberê Gelê Kurd Abdullah Ocalan aştî ne pêkan e û wiha pê de çû: “Ji banga Aştî û Civaka Demokratîk a Serok Apo û vir ve em weke ciwan di nava civakê de xebatên xwe didomînin. Tenê wêneyekî Serokatî, gotin û nirxandineke wî behna me vêdike û hevî dide civakê. Yek jî mijara herî girîng a xebatên me jî azadiya fizîkî ya Serokatî ye. Heta Serokatî azad nebe xebatên me dê bimeşin û em nikarin bigihîjin encamê. Ji bo pêvajoya Aştî û Civaka Demokratîk bigihije encamê jî divê stûtaya Serokatî diyar bibe. Divê Serokatî azad bibe û di nava civakê de kar bike, bigihije welatê xwe bigihije gelê xwe. Pêvajo tenê wisa dikare encam bigire.”
‘Ji bo pêşvebirina pêvajoyê xebatên me dê bidomin’
Ji endamê Meclisa Ciwanan Harun Turkan jî diyar kir ku ew di van civînan de hem li ser kêmasiyên xwe û hem jî li ser xebatên ku dê bikin, disekinin û ev tişt anîn ziman: “Niha pêvajoyek hatiye destpêkirin û divê weke civan em jî hezê bidin vê pêvajoyê. Em ê li dijî şerê taybet xebatên civanan bimeşînin. Heza civakê jî ji civanan pêk tê. Weke civanên welatparêz ji bo avakirina civakeke demokratîk em jî dixwazin bi xebatan vî barî hilgirin ser milan. Xebatên me niha jî berdewam dikin lê em ê li ser kêmasiyên xebatên xwe rawestin û ji bo derbaskirina van kêmasiyan plansaziya xebatan bidin pêş xwe. Weke Serokatî dibêje, ‘Me ciwan destpêkir û em ê bi ciwan biserbikevin’ em ê jî weke civan ji bo pêşvebirina pêvajoyê xebatên xwe bidomînin.”
‘Azadiya Serokatî xala herî girîng e’
Harun Turkan anî ziman ku armanca sereke ya xebatên wan pêkanîna azadiya fizîkî ya Rêberê Gelê Kurd Abdullah Ocalan e û axaftina xwe wiha qedand: “Serokatî ji bo maf û nasnameya Kurdan tevger ava kir û niha jî nasname û hebûna Kurdan daye qebûlkirin. Di vê pêvajoyê de azadiya fizîkî ya Serokatî ji bo me xala herî girîng e. Dema Serokatî azad bû dewlet dê neçar bimînê mafên me jî qebûl bike. Weke ciwan ji bo vê yekê çi ji destê me were em ê bikin. Em dixwazin wek heyetek biçin Girava Îmraliyê û bi Serokatî re hevdîtinê pêk bînin û ji fikir û remanên wî sûd bigirin. Her wiha nêrîn û fikren xwe jî pê re parve bikin. Heke em karibin hevdîtinê pêk bînin ew ê ji bo me bibe moraleke mezin.”
