Xwendekarên Zanîngeha Dîcleyê bi boneya 1ê Gulanê Cejna Karker û Kedkaran a Cîhanê çalakiya “Kursiya Azad” li dar xistin. Xwendekaran destnîşan kir ku têkoşîna kedê û azadiyê bi hev ve girêdayî ne û gotin: ” Bi ruhê vê rojê, em mil bidin milê hev û bigihin serkeftinê.”
Xwendekarên Zanîngeha Dîcleyê bi boneya 1ê Gulanê Cejna Karker û Kedkaran a Cîhanê li kampusa zanîngehê li hev civiyan. Xwendekaran bi çalakiya “Kursiya Azad” bal kişandin ser mafên kedkar û xwendekaran. Di dema çalakiyê de dowîzên ku nivîsên “Di Sosyalîzmê de israr, di mirovbûyinê de israr e”, “Li hemberî kedxwariyê jiyanek e kominal”, “Keda me mafê me ye” û “Bijî 1ê Gulanê” li ser dinivîsî hatin hildan.
‘1ê Gulanê roja avakirina siberojê ye’
Hasan Karsû yê bi Kurdî axivî diyar kir ku 1ê Gulanê ji bo hemû gel û çînên bindest rojeke dîrokî ye. Hasan Karsû bal kişand ser girîngiya têkoşînê û wiha got: “Hewce ye ku mirov dîroka vê roja berxwedanê hinek din bide naskirin. Ev têkoşîn ne îro dest pê kiriye; ji tevgera ciwanên 68an heta îro berdewam dike. Mirov divê li ser vê têkoşînê siberoja xwe ava bike.”
‘Ev têkoşîn ji bo me mafekî rewa ye’
Hasan Karsû di berdewama axaftina xwe de destnîşan kir ku ev roj di heman demê de ji bo mafên ziman, nasname û hebûnê ye: “Ji bo gelê Kurd ev tişt esas in; derketina mafê gelê xwe, parastina ziman û hebûna xwe. Ev têkoşîn di aliyê aborî û mafên demokratîk de ji bo me mafekî rewa ye.”
Banga têkoşîna hevpar
Hasan Karsû di dawiya axaftina xwe de diyar kir ku tevî hemû zext û gefan, xwendekarên zanîngehê dê bi paş ve gav neavêjin û got: “Karker, xwendekar, gundî û xebatkarên fabrîkayê; em hemû di bin banê têkoşînekê de digihin hev. Armanca me mafên bingehîn in. Em wekî xwendekarên Kurd dê berxwedana xwe xurttir bikin û civakeke demokratîk û aştiyane ava bikin. Bi ruhê vê rojê, em mil bidin milê hev û bigihin serkeftinê.”
Dû re gelek xwendekar derketin ser “Kursiya Azad” derbarê girîngî û têkoşîna 1ê Gulanê de axivîn û bal kişandin ser ked û têkoşîna karker û kedkaran.
Çalakî bi dirûşma “Bijî 1ê Gulanê” bi dawî bû.
