MYKa DEM Partiyê bi boneya salvegera 111an a tevkujiya Ermeniyan daxuyanî da û got: “Lêborînxwestin ji gel û baweriyên mexdûr, pêkanîna edaletê û rûbirûbûna bi sûcên li dijî mirovahiyê re rêbazên girîng ên ji bo avakirina pêşerojek hevpar û wekhev û aştiya civakî ne.”
Desteya Rêveberiya Navendî (MYK) ya DEM Partiyê bi boneya 24ê Nîsanê salvegera 111an a tevkujiya li dijî Ermeniyan daxuyaniyeke niviskî weşand. Di daxuyaniyê de hat gotin ku ji bo pêçandina birînan, hevrûbûna rastiyên dîrokê pêwistiyeke bingehîn e û wiha hate gotin: “Lêborînxwestin ji gel û baweriyên mexdûr, pêkanîna edaletê û rûbirûbûna bi sûcên li dijî mirovahiyê re rêbazên girîng ên ji bo avakirina pêşerojek hevpar û wekhev û aştiya civakî ne. 111 sal ji ser qirkirina etnîkî, olî û çandî ya li dijî welatiyên Ermenî pêk hatî re derbas bû. Ev pêvajo, ku di 24ê Nîsanê de dest pê kir, bi sirgûnkirin û komkujiya bi sed hezaran Ermeniyan berdewam kir.”
‘Tu netew ji yên din bilintir nîne’
Di daxuyaniyê de hat gotin ku tunehesibandina netew, çand û baweriyên cuda xeletiyeke dîrokiyê û wiha hate domandin: “Rastiya gerdûnî ku tu nasnameyek etnîkî, ziman, çand an bawerî li ser van axan ji yên din bilindtir nîne. Hemû wekhev û azad in û divê ji aliyê siyasî ve jî were qebûl kirin. Pêşxistina têkiliyên dîplomatîk, bazirganî, aborî û çandî bi Ermenistanê re, ku beşek ji herêma me ye, hem di berjewendiya gelan û hem jî di pêdiviya wan de ye û hem jî rêyek e ji bo avakirina aştiyê li Qefqasyayê ye. Bi van hest û ramanan, wekî gelên kevnar ên Anatoliya û Mezopotamyayê, em careke din êş û şîna 111 salan a gelê Ermenî û gelên din ên Xiristiyan parve dikin. Em hemû kesên ku di wê serdemê de hatine qirkirin bi xemgînî û rêzdarî bi bîr tînin. Em vê trajediya mezin a mirovî di kûrahiya dilê xwe de hîs dikin.”
