Rêxistina DEM Partî ya Îzmîrê, ji bo piştgiriya berxwedana li Fabriqeya Pîşeyan çalakiyek li dar xist. Di serdanê de parlamenterê DEM Partiyê Îbrahim Akin bang kir û got ku divê her kes bêyî cudahiya nêrînên siyasî piştevaniya vê têkoşînê bike.
Şandeya Partiya Wekhevî û Demokrasiyê ya Gelan (DEM Partî) ku parlamenter Îbrahim Akin û hevserokên bajarê Îzmîrê jî di nav de bûn, ji pêşiya Stasyona Metroyê ya Halkapinarê heta ber Fabriqeya Pîşeyan meşiyan. Di meşê de girseyê bi yek dengî dirûşma “Fabriqeya Pîşeyan nayê desteserkirin” berz kirin.
‘Em li hemberî xerabiyeke rêxistinkirî ne’
Îbrahim Akin li ber avahiya fabriqeyê axivî û diyar kir ku ew ji bo piştevaniyê li wir in. Îbrahîm Akin bal kişand ser polîtîkayên desthilatdariyê û got: “Em bi xerabiyeke rêxistinkirî re rû bi rû ne. Ev operasyonek e ku li dijî milkê gelê Îzmîrê tê kirin. Berxwedana li vir pir bi qîmet e; eger ev berxwedan bi ser bikeve, em dikarin li herêmênn din ên welat jî pêşiya mînakên bi vî rengî bigirin.”
Akin di berdewamiya axaftina xwe de bal kişand ser cudakariya hiqûqî û wiha debirî: “Ji ber ku şaredarî di destê CHPê de ye, dixwazin dest deynin ser vê derê û bidin weqfan. Lê li bajarên wekî Qeyserî û Konyayê tam berevajî vê yekê dikin; milkên weqfan didin şaredariyan. Ev yek nîşaneya herî aşkere ye ku desthilatdarî çawa cudakariyê dike û tu pîvan û hiqûqê nas nake. Lewma em bang li her kesî dikin: Ev mesele ne tenê pirsgirêka Îzmîrê ye. Parastina milkê bajarekî, bi qasî mafê hemwelatîbûnê û mafê hilbijartinê girîng e. Em ê bêyî cudahiya nasnameya siyasî, ji bo parastina mafê vî bajarî û ji bo piştevaniyê li vir bin û bi hev re têkoşînê bidomînin.”
