Fermandariya Giştî ya Yekîneyên Parastina Jin (YPJ), bi boneya 14emîn salvegera damezrandina xwe daxuyaniyeke girîng weşand. YPJê diyar kir ku tevlêbûna wan a di nava artêşa Sûriyeyê de wê bibe bingeha artêşeke nûjen û destnîşan kir ku hevdîtinên wan ên bi Şamê re destpêka qonaxeke nû ya têkoşînê ye.
Fermandariya Giştî ya YPJê bi daxuyaniyeke nivîskî salvegera 14an a damezrandina xwe li Rêber Apo, tevahî jinan, gelê herêmê û şervanên xwe pîroz kir. YPJê di daxuyaniyê de bi bîr xist ku 4ê Nîsanê rojbûna Rêberê Gelê Kurd Abdullah Ocalan e û di heman demê de roja damezirandina YPJê ye.
‘YPJ bû modela xweparastinê ya jinan’
Di daxuyaniyê de hate gotin ku YPJê bi têkoşîneke dijwar û berdêlên giranbiha xwe ava kiriye û di encama vê têkoşînê de karî jinan û gelên herêmê ji zilma rejîma Baas û terora DAIŞê rizgar bike. YPJê destnîşan kir ku wan ne tenê ax parastine, lê belê di warê hişmendî û civakî de guhertineke dîrokî pêk anine. Di daxuyaniyê de wiha hate gotin: “YPJ îro ji bo tevahî jinan bûye modela herî xurt a xweparastinê. Me nîşan da ku jin dikarin zincîrên koletiyê bişkînin û qedera xwe bi destê xwe binivîsin.”
‘Tevlêbûna artêşê wê bibe misogeriya destûrî’
YPJê bal kişand ser nîqaşên tevlêbûna nava wezareta parastinê û girîngiya vê gavê ya ji bo pêşeroja Sûriyeyê destnîşan kir. Daxuyaniyê wiha dom kir: “Tevlêbûna YPJê ya nava wezareta parastinê wê bibe wesîle ku artêşeke nûjen û mînak a Sûriyeyê were avakirin. Hebûna YPJê ya ku bi xwînê hatiye avakirin, bi vî rengî dikeve bin misogeriya destûrî û qanûnî. Ji bo pêşerojeke wekhev û azad, ev pêngav xwedî girîngiyeke dîrokî ye.”
‘Me li Şamê hevdîtin pêk anî’
Fermandariyê ragihand ku wan li Şamê bi Wezareta Parastinê re hevdîtinek pêk aniye û ev agahî parve kirin: “Ev hevdîtin tê wateya destpêkirina pêvajoyeke nû ya têkoşînê. Hevdîtinên me wê dewam bikin, lê ev nayê wateya ku em gihîştine lihevkirinekê. Ji bo misogerkirina tevlêbûna YPJê ya di nava artêşê de, pêdivî bi têkoşîneke hevpar a tevahî jinan û civakê heye.”
Banga ji bo têkoşîna hevpar
YPJê di dawiya daxuyaniya xwe de bang li tevahî tevgerên jinan ên li Rojava, Sûriye û cîhanê kir ku xwedî li vê pêvajoya nû derkevin û ev xal destnîşan kir: “Pêşeroja demokratîk û azad a Sûriyeyê dê bi pêşengiya jinan were avakirin. Em ê heya dawî erkên xwe yên ji bo azadiya gelan û wekheviya jinan bicih bînin.”
