Çalakiyên 18emîn Mîhrîcana Çand û Werzîşê ya 4ê Nîsanê ku bi boneya rojabûna Rêberê Gelê Kurd Abdullah Ocalan tê lidarxistin, bi vekirina pêşengeha hunerî didome.
Li Wargeha Penaberan a Şehîd Rustem Cûdî (Mexmûr) 18emîn Mîhrîcana Çand û Werzîşê ya 4ê Nîsanê ku bi boneya Rojabûna Rêberê Gelê Kurd Abdullah Ocalan tê lidarxistin, bi çalakiyên curbicur berdewam dike. Di çarçoveya mîhrîcanê de li Salona Konferansê Navçeyê pêşengeha hûnerî hate vekirin. Di pêşengehê de gelek hunerên dest ên ji hêla xwedevan, hunermend, zarok û ciwanên wargehê ve hatine çêkirin, ji hezkerên hunerê re hatin pêşkêşkirin. Pêşengeha ku îro serê sibê hate vekirin wê heta 4ê Nîsanê ji serdana gel re vekirî be.
‘Rojbûna gelê Kurd e’
Têkildarî pêşengeha bi rêzgirtinê hate vekirin Xwendevana Atoleya Şehîd Adil Mêrdîn, Zozan Hilalî axaftina vekirinê kir. Zozan Hilalî rojbûna Rêberê Gelê Kurd Abdullah Ocalan pîroz kir û wiha got: “Îro netenê rojbûna Rêber Apo ye, di heman demê de rojbûna gelê Kurd e. Gelê Kurd xwedî dîrokek kevnar ya çand û hunerî ye. Her tim parastina çand û zimanê xwe kiriye, ji bo vê jî rastî gelek qirkirin û asîmilasyonê hatiye. Gelê Kurd ku di nav tarîtiyê de dijiya, bi saya Rêber Apo dest bi têkoşîna azadiyê kir. Ji bo wê jî 4ê Nîsanê ji bo me xwedî giringiyek zêde ye. Emê heta dawiyê şopdarê rêça Rêber Apo bin.”
Her wiha ji ber ku roja 2yê Nîsanê roja zarokên astengdar e, qûrdela pêşangehê ji aliyên zarokên astengdar ên Navenda Hêvî ve hate birîn û pêşengeh ji temaşkirinê re hate vekirin.
