Efrîniyên duh vegeriyan bi beşdarî û alîkariya Asayîşa Rojavayê Kurdistanê ve bi awayek ewle li navçeyên Cindirês û Şiyê hatin bi cih kirin. Xelîl got ku niha ji bo pêşwazîkiran komek dîlgirtiyan ku tên berdan derbasî Hesekê dibin.
Efrîniyê duh di çarçoveya Peymana 29ê Çileyê de vegeriyan ser axa xwe, bi beşdariya Asayîşa Rojavayê Kurdistanê bi awayek ewle li malên wan ên li navçe û gundewarên Cindirês û Şiyê hatin bicihkirin. Cîgirê Fedmandarê Ewlehiya Hundirîn a Hesekê Mehmûd Xelîl têkidarî vegera Efrîniyan axivî û wiha got: “Di encama hevdîtin û xebatên ji bo vegera koçberan hatin meşandin de îro koma yekemîn gihişt Efrînê. Ji bo vegerek bi ewle Fermandariya Hêzên Ewlehiyê jî ligel koçberan gihişt Efrînê. Ji bo Efrînî bi ewle vegerin ser mal û axa xwe bingeha guncav amade dike.”
Bi awayek ewle hatin bicihkirin
Xelîl got ku koma yekemîn bi awayek bêpirsgirêk gihiştiye Efrînê û li navçeyên Cindirês, Şiyê û nehiyeyên girêyaî van navçeyan bi cih bûne. Xelîl derbirî ku di dema bicihbûna welatiyan de tu pirsgirêk derneketine û di nav hawirdorek bi ewle de malbat gihiştine malên xwe.
Ji bo kesên windayî jî xebat didomin
Mehmûd Xelîl daxuyand ku ji bo domandina alîkariya mirovî ya malbatên vegeriyayîn jî xebat didomin. Xelîl got ku xebatên wan ên derbarê dosyaya kesên dîl hatine girtin û windakirin jî bi lez xebatê dimeşînin û wiha got: “Niha em dê li Hesekê pêşwaziya komek kesên dîl hatine girtin biçin. Kesên bên berdan dê êvarê bigihin Hesekê.” Xelîl anî ziman ku ji bo pêkanîna Peymana 29ê Çileyê xebatên xwe di her alî de berdewam dikin.
