Platforma Lêkolînên Koçberiyê li ser sînorê Îranê daxuyaniyek da û bal kişand ser pêleke gengaz a koçberiyê û wiha got: “Divê li herêmê çareseriyeke aştiyane, demokratîk û li ser bingeha mafên mirovan pêk bê.”
Platforma Lêkolînên Koçberiyê, têkildarî êrişên Îsraîl û DYAyê yên li ser Îranê û pêla koçberiyê ya ku dibe ku rû bide, li navçeya Seravê ya Wanê, li ber deriyê Kapikoyê ku di navbera Rojhilat û Bakurê Kurdistanê de ye daxuyanî da çapemeniyê. Di daxuyaniya ku pankarta “Bila gel berdêla şer nedin. Ji koçberkirina bi darê zorê re na!” hat vekirin de, endamên DEM Partî, DBP û Platforma Saziyên Demokratîk amade bûn.
‘Şer rîska krîzeke herêmî derdixe holê’
Hevserokê Komeleya Şopandina Koçberiyê ya Mezopotamyayê (GOÇ-DER) Mehmet Vecîh Aydogan diyar kir ku ligel şerê li Rojhilata Navîn krîza koçberiyê jî dest pê kiriye û wiha got: “Êrişên ku rojên dawî de ji aliyê DYA û Îsraîlê ve li dijî Îranê pêk hatin, hawirdora aştî û îstîkrara li herêmê ya ku jixwe nazik bû, ber bi krîzeke girantir ve bir. Bi êrişên ku di 28ê Sibatê de dest pê kirin û bi misîllemeyên piştî wê yên Îranê re, li Rojhilata Navîn rageşî bi lez zêde bû; pevçûnan rîska krîzeke herêmî ya berfireh a ku dikare bandorê li gelek welatan bike, derxistiye holê.”
‘Divê çareserî pêk were’
Aydogan bang li saziyên navneteweyî kir ku mafên sivîlan biparêzin û wiha got: “Em bang li hemû saziyên gelemperî yên têkildar û mekanîzmayên navneteweyî dikin ku mafên sivîlên ku neçar mane koç bikin biparêzin, pêşî li cudakariyê bigirin û hemû tedbîrên mirovî yên pêwîst bi lezgînî bistînin. Vekirina deriyên me ji bo mirovên ku neçar mane ji şer û polîtîkayên zextê birevin ne tercîhek e, hewcehiya mirovbûnê ye. Em daxwaz dikin ku êrişên li ser hemû sivîlan derhal bên rawestandin û li herêmê çareseriyeke aştiyane, demokratîk û li ser bingeha mafên mirovan pêk bê.”
