Wezîrê Dadê Akin Gurlek derbarê cenazeyê Gulistan Dokûyê de agahî da û got: “Dibe ku cenazeyê wê bi bikaranîna madeyên kîmyewî bi tevahî ji holê hatibe rakirin.”
Wezîrê Dadê Akin Gurlek derbarê doza Gulistan Dokûyê de ku di 5ê Çileyê de li Dêrsimê hatibû kuştin û windakirin, pirsên rojnamegeran bersivandin. Wezîrê Dadê derbarê dosyaya dozê de wiha got: “Der barê kiryarên berê yên hin rayedarên dewletê yên tên îdiakirin ku erkên xwe ji bo astengkirina lêpirsînê an jî jiholêrakirina delîlan bi awayekî nebaş bikar anîne. Îdia û encamên cidî têne lêkolînkirin.”
Cenaze herî dawî birine li ser rêya Pêrtagê
Wezîrê Dadê Akin Gurlek derbarê pirsa li ser cenazeyê Gulistan Dokûyê hatiye pirsîn jî ev agahî dan: “Yek ji mijarên herî girîng ji bo me dîtina cenazeyê Gulistanê ye. Hin îfadeyên di dosyayê de nîşan didin ku dibe cenaze çend caran hatibe veguhastin. Dibe ku cenaze bi bikaranîna madeyên kîmyewî bi tevahî ji holê hatibe rakirin. Hinek îfade hene û destnîşan dikin ku ew herî dawî birine cihekî li ser rêya Pêrtagê.”
