Li gundê Kelê yê ser bi navçeya Farqîna Amedê ve ciwanê bi navê Mecnûn Demîr di qenala avê ya DSÎyê de xeniqî.
Li gundê Kelê yê ser bi navçeya Farqînê ya Amedê ve ciwanê bi navê Mecnûn Demîr (20) ji bo xwe hînik bike ket qenala avê ya Saziya Karên Avê ya Dewletê (DSÎ). Mecnûn Demîr ê ku nikaribû xwe rizgar bike, bi ava qenalê re çû û xeniqî. Li ser agahdarkirinê tîmên tenduristiyê, leşker û noqav ango binavgerê Midûriyeta Agirkujiyê yên Şaredariya Amedê û Êlihê sewqî cihê bûyerê hatin kirin.
Di encama xebatên lêgerînê ya derdora çar saet û nîvan de cenazeyê Mecnûn Demîr hate dîtin. Hate zanîn ku cenaze çar-pênc kîlometre bi avê re çûye û li Gundikê Hecî Brahîm ê Farqînê hatiye dîtin. Cenaze ewilî ji bo otopsiyê rakirin Nexweşxaneya Dewletê ya Farqînê û ji wir jî sewqî Saziya Tiba Edlî ya Amedê hate kirin. Piştî karûbarên otpsiyê cenaze li gundê Kelê hate veşartin.
Hate zanîn ku Mecnûn Demîr li gund şivaniyê dikir.
