Hevşaredarê Bajarê Mezin ê Wanê Abdullah Zeydan ku di Festîvala Tetwanê de axivî, bal kişand ser pêvajoya Aştî û Civaka Demokratîk û got: “Em li vir bang li hikûmet û dewletê dikin; ev pêvajo siberoja gelê Kurd û Tirk e.”
Roja 1emîn a 58emîn Festîvala Çand û Hunerê ya Şaredariya Tetwanê ku bi dirûşma “Li Tetwanê çand heye, huner heye, em hene” tê lidarxistin, bi konserên Neslîhan Edîş, Şahê Bedo û Serhedo berdewam kir. Konserên ku li ber qeraxa Behra Wanê hat lidarxistin rastî eleqeyeke mezin hat û di demeke kurt de qad tije bû.
‘Tetwan di warê çand û hunerê de mînak e’
Di destpêka konseran de Hevşaredara Tetwanê Belkiza Beştaş Epozdemîr li ser navê şaredariyê xêrhatina beşdaran kir û spasiya hemû kes û saziyên ku di lidarxistina mîhrîcanê de ked dane kir. Belkiza Beştaş Epozdemîrê di berdewama axaftina xwe de wiha got: “Tetwan li herêma serhedê di warê çand û hunerê de mînak e. Bi mîhrîcanên bi naverok dewlemend ji çand û hunera gelê Kurd re xizmetê dike û çand û hunera gelê Kurd diparêze.”
‘Gelê Kurd her tim li çand û zimanê xwe xwedî derket’
Dû re Heşaredarê Bajarê Mezin ê Wanê Abdullah Zeydan ku li şûna wî qayim hatiye tayînkirin, axivî û ji bo mîhrîcanê spasiya Şaredariya Tetwanê kir. Abdullah Zeydan got: “Bi salan e çand û zimanê gelê Kurd înkar dikin û hewl didin asîmîle bikin. Le gelê Kurd jî her tim li çand û zimanê xwe xwedî derket. Ev mîhrîcanên bi vî rengî ji bo parastin û pêşxistina çand û hunerê pir girîng in. Ji ber vê hezar carî mala wan ava yên ku ked dane vê mîhrîcanê.”
‘Ev pêvajo pêşeroja gelê Kurd û Tirk e’
Abdullah Zeydan di berdewama axaftina xwe de diyar kir ku gelê Kurd ji bo çand û zimanê xwe biparêze gelek bedelên giran dane û axaftina xwe wiha domand: “Ez li vê derê bejna xwe li hember kesên ku di vê oxirê de canê xwe dane ditewînim û wan bi rêzdarî bi bîr tînim. Em di pêvajoyeke dîrokî re derbas dibin. Rêberê Gelê Kurd Rêzdar Abdullah Ocalan di 27ê Sibata 2025an de bang Aştî û Civaka Demokratîk kir. Got em ji aştiyeke bi rûmet re amade ne, êdî bes e ev şer. Em li vir bang li hikumet û dewletê dikin; ev pêvajo pêşeroja gelê Kurd û Tirk e. Divê dewlet vê pêvajoyê heba neke û gavên pêwîst bavêje. Em hêvîdar in ev mîhrîcan bibe wesîleya aştî azadiyê, bibe wesîleya azadiya birêz Abdullah Ocalan û hemû hevalên me yên di zindanan de.”
Piştî axaftinan stranbêj Neslîhan Edîş derket ser dikê û bi stranên xwe qada konserê coşand. Piştre Şahê Bedo stranên xwe ji bo guhdaran got. Herî dawî jî rapbêj Serhedo derket ser dikê û ji guhdaran re stranên xwe sitrî.
Bernameya sibê
Bi konsera Serhedo roja yekemîn ya mîhrîcanê bi dawî bû.
Wê mîhrîcan sibê bi pêşengeha wêneyan, şano û konsera stranbêj Rûken Yilmaz, Mehmet Atli û Koma Agirê Jiyan bidome.
