Li taxa Duzyolê ya navçeya Tûşbayê, ciwan û niştecîhên taxê bi armanca hişyarkirina li dijî bi karanîna hişbirê civînek li dar xist.
Ciwan û niştecîhên taxa Duzyolê bi dirûşma “Em rê nadin hişbirê” civînek li dar xist. Civîn li qada dawetê ya li taxa Duzyolê ya navçeya Tûşbayê ya Wanê hate li darxistin. Endamên Meclisa Ciwanan a DEM Partiyê, rêveberên rêxistinên bajêr û navçeyan yên DEM Parti û DBP yên Wanê û gelek welatî beşdarî civînê bûn.
Civînê bi govendê dest pê kir. Di civînê de ciwanan pir caran dirûşmên “Jin jiyan azadî”, “Ciwan fedayiyên Apo ne” berz kirin. Jin û zarokên li taxê jî tevli civînê bûn. Piştî govendê, civînê bi daxuyaniya ji bo çapemeniyê berdewam kir.
Li ser navê ciwanan Bilal Soylu daxuyanî xwend. Bilal Soylu diyar kir ku wan li dijî zêdebûna tiryak û fihûşê ya li taxa xwe ev civîn li dar xistiye. Soylu destnîşan kir ku temenê bikaranîna tiryakê her ku diçe kêm dibe û got: “Li taxa me bikaranîna madeyên hişbir her ku diçe zêde dibe. Ev yek berpirsiyariya me jî zêdetir dike. Em ê destûrê nedin tiryakê û fihûşê. Em aştî û aramiyê dixwazin, ne bengîtiya madeyan.”
Daxuyanî bi dirûşma “Bijî berxwedana ciwanan” û bi çepikan bi dawî bû.
