Li Stenbolê bîranîna şehidên Kurdistanê didome. Li Stenbolê ji bo şehîdan li navçeya Başakşehîrê şîn hate danîn.
Bi Pêşengtiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Stenbolê ji bo şehîdên Tevgera Azadiyê ya Kurdistanê yên di dîrokên cuda de jiyana xwe ji dest dane, li navçeya Başakşehîrê şîn hate danîn. Malbatê şehîdan, Dayikên Aştiyê, Hevserokên DBPê, endam û rêveberên partiyên siyasî, nûnerên saziyên civakî û gelek welatî tev li şînê bûn. Di eywana bîranînê de li ser maseyan wêneyên şehîdan, Rêberê Gelê Kurd Abdulla Ocalan û gul hatin danîn. Li eywanê pankartên “Em şehîden rûmetê bi bîr tînin”, “Şehîdên me rûmeta me ne”, “Têkoşîna wan rêya me ronî dike” û “Şehîd Namirin” hatin daliqandin.
Bernameya ji bo cangoriyan bi deqeyeke rêzgirtinê dest pê kir.
Piştî rêzgirtinê Dayika Şehîd Ferrah Guneş û bavê şehîd Necmettîn Tarin axivîn û diyar kirin ku ev şehîd şehidên Kurdistanê ne.
‘Şehîdên me îxanetê hilweşandin’
Nedîm Yilmaz ê ku piştî 33 salan ji girtîgehê derketibû axivî û diyar kir ku şehîd şehîdên Kurdistanê ne û wiha got: “Şehîdên me bêtereddut ked dan. Dema em dibêjin şehîd ew dibin şahid. Ev şahidên têkoşînê ne. Kurdan bi Kurdan re, Kurdan bi dijmin re dan nasadin. Şehîd hêvî dane Kurdan, Kurdan ji mirinê anîn vê astê. Zarokên hilbijarte ne, zarokên taybet in. Li dijî çekên kîmyewî li ber xwe dan. Serok dibêje ji bîr kirin îxanet e. Şehîdên me îxanetê hilweşandin.”
‘Em ê ala wan li erdê nexin’
Dûre hevserokê giştî yê DBPê Keskîn Bayindir axivî. Keskîn Bayindir destnîşan kir ku her yek cangoriyan destanek nivîsandiye û wiha got: “Bila tu kes xwe tenê nebihîse. Bi milyonan gelê me îro gel hev in. Wekî malbatan jî got şehîd şehîdên Kurdistanê ne. Em li ku bin ev têkoşîna ku bi serokatiya Rêber Apo dimeşe me anîn gel hev. Her şehîd kevirek danîn ser hev û kelehek avakirin. Em şehîdên xwe dispêrin axê lê em dibêjin aştî, dayikên şehîdan dibêjin aştî. Spartina axê ne dawîbûn e, destpêkek e. Em ê ala wan li erdê nexin.”
Piştî axaftinan sînevîzyon hate temaşekirin û bi xwendina mewludê şîn bi dawî bû.
