Li Stenbolê bi pêşengiya MEBYA-DERê li navçeyên Baxcilar û Sancaktepeyê ji bo cangoriyên Kurdistanê bernameya biranînê tê lidarxistin. Siyasetmedar Ardil Çeşme diyar kir ku dema ku ew tev li rêxistinê bûn, dizaniyan ku li pêşiya wan şehîdbûyîn û girtîgeh heye û wiha got: “Lê dîsa jî em tevlibûn. Em deyndarê şehîdan in. Em li ku bûn, em jin, mêr û zarok jî bin divê layiqê wan şehîdan bibin.”
Bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Stenbolê ji bo cangoriyên Tevgera Azadiyê ya Kurdistanê yên di dem û cihên cuda de jiyana xwe ji dest dane, li navçeyên Baxcilar û Sancaktepeyê bernameya bîranînê tê lidarxistin. Malbatên cangoriyan, sekreteryayê Îmraliyê Veysî Aktaş, Hevserokê DBP Keskîn Bayindir, Dayikên Aştiyê, aktivîstên TJAyê, parlamenterên DEM Partiyê, endam û reveberên partiyên siyasî û nûnerên saziyên civakî tev li bernameyê bûn.
Bername ji bo cangoriyan deqîqeyekî rezgirtinê dest pê kir. Di eywana ku bîranîn tê lidarxistin de di ser maseyan de wêneyên cangoriyan, Rêberê Gelê Kurd Abdullah Ocalan û qerenfîl û find hatin danîn. Li eywanê pankartên “Em şehîden rûmetê bi bîr tînin”, “Şehîdên me rûmeta me ne”, “Têkoşîna wan rêya me ronî dike” û “Şehîd Namirin” hatin daliqandin.
Piştî rêzgirtinê sînevîzyon hate temaşekirin.
‘Heta ku em roja xwe ronî bikin, em azad nabin têkoşîn jî bi dawî nabe’
Piştî temaşekirina sînevîzyonê Ardil Çeşme ya ku piştî 31 salan ji girtîgehê derketibû axivî. Ardil Çeşme diyar kir ku bi saya şehîdan ew li vir in û wiha got: “Dema em tev li rêxistinê bûn, me dizanî li pêşiya me şehîdbûyîn û girtîgeh heye. Lê dîsa jî em tevlibûn. Em deyndarê şehîdan in. Em li ku bûn, em jin, mêr û zarok jî bin divê layiqê wan şehîdan bibin. Heta ku Kurd hebin dê rêya me jî hebe. Em dibêjin şehîd namirin. Ji ber ku şehîd herdem li gel me ne. Heta ku em roja xwe ronî bikin, em azad nabin têkoşîn jî bi dawî nabe.”
‘Heta dawiyê em ê li ser şopa şehîdan bin’
Sekreteryayê Îmraliyê Veysî Altaş jî anî ziman ku rast e rojekî giran e lê ev dîroka wan e û wiha axivî: “Serokatî dixwaze vê dîrokê biguherîne. Pêşketin heye, Serok û artêş heye. Em hevalên Serokatî ne lê em nîvco ne lê şehîd tam in. Em şehîdan ji bîr nakin. Heta dawiyê em ê li ser şopa şehîdan bin.”
‘Em soz didin ku wekî şehîdan têkoşînê bilind bikin’
Hevserokê Giştî ya DBPê Keskîn Bayindir destnîşan kir ku îro şehîdan bi dil û can bi bîr tînin û wiha got: “Îro em baweriya xwe nû dikin. Em dizanin li her derê Kurdistanê xemginî heye. Lê ev ne şîn e, bawerî parvekirin e. Em soz didin ku wekî şehîdan têkoşînê bilind bikin.”
Bername berdewam dike.
