YPJ’yî bi munasebetê serrgêra xoverdayîşê Kobanî ya 11. Eşkerayîyêk daye û vat, “ Ma vengdanê şarê xo ke bi ruhê yewbîyayîşê neteweyî seba pawitişê estbîyayîş û îradeyê xo derûdorê destkewteyanê şorişî de bibo yew.
Fermandarîya Pêroyî ya Yewîneyanê Pawitişê Cinî (YPJ) bi munasebetê serrgêra xoverdayîşê Kobanî ya 11. ya vera çeteyanê DAIŞ’î, eşkerayîyêk daye.
Eşkerayîye de wina ame dîyarkerdene: “Xoverdayîşo ke kuçeyanê Kobanî de ame kerdene qederê şarêkî vurna. Têkoşînê Kobanî cuyêka azade û birûmete de îsrarkerdiş o. Kobanî bi xoverdayîşê xo yo tarîxî, heme însanîyetî rê bîye îfadeyê hêvîya rojanê azadan.”
Eşkerayî wina dewam kerd: “Kobanî bi aşman mîyanê hesarêko giran de mend û çeteyê DAÎŞ’î bi hewayêko tewr wehşîyane hêrişê Kobanî kerd. Vera heme wehşîyetê çeteyanê DAÎŞ’î, her kuçeyê Kobanî de bi pêşengîya şervananê YPJ’yî û bi piştîya şarê ma destanê qehremanîye ameyî nuştene. Ewro zî reyna eynê feraseto cîhadîst ke ti wareyê cuye de estbîyayîşê cinîyan nas nêkeno, bi grûbanê xo yê çeteyan hêrişê heme Rojava keno û bi taybetî zî hêrişê Kobanî keno. Nê hêrişê ke yenê kerdene, cuye û ewleyîya şarê ma tehlukeyêka girde kenê. Amancê hêrişanê serra 2015î çi bî yê ewroyî zî eynî yo. Reyna bi nê hêrişan wazenê şarê ma qirkerdişêkî reyde rî bi rî verdê.
Şarê ma seba girewtişê azadîye zaf bedêlê giranî dayî. Serkewtişo gird ê Kobanî yê 26ê çeleyê 2015î zî bi vindertişê qehreman ê şarê ma ame girewtene. Coka vera nê hêrişê ke destkewteyan û îradeyê şarê ma amanc kenê, tena bi ruhê şerê şarî yê şorişgêr eşkeno serkewo. Nê bingehê ser o ma venga heme şarê xo danê ke derûdorê destkewteyanê şorişî de kom bibê ke ma bi ruhê yewbîyayîşê neteweyî wayîrê estbîyayîş û îradeyê xo vejîyê.
Ma sey Yewîneyanê Pawitişê Cinî şexsê şehîdanê xo yê bêmerg Arîn, Rêvan, Gelhat, Herdem, Îvana Hoffman, Sarya Ozgur û heme şehîdanê xo yê şorişê Rojava yad kenê û ma sozê xo yê caardişê xeyalanê şehîdan newe kenê. Ruhê xoverdayîşê Kobanî teqez ma beno serkewtiş.”
