Rojnameger Sînan Cûdîyî vat ke badê xopeyserantişê DYA Hewlêr bê sîwana emnîyetî mendo û bale ante tehdîdanê mîlîsanê şîayan û DAIŞî ser o: “Pêşmerge şerê modernî rê amade nîyo. Çareserî hêzê teberî nîyê; ganî yewîya zereyî û xeta xopawitişî ya kurdan bêra awankerdene.”
Badê ke hêzê DYA û Koalîsyonê Mîyanneteweyî Iraq û Başûrê Kurdîstanî ra xo antî peyser, averşîyayîşê leşkerî û sîyasî yê Rojhelatê Mîyanênî bîyî rojeva sereke. Rojnameger Sînan Cûdîyî netîceyê nê xopeyserantişî Ajansa Welat rê erjnayî.
Cûdîyî vat ke Bexdad de xopeyserantiş sey “roja serdestî û xelasîye” ame pêşwazîkerdene, la Başûri de sey rijîyayîşê sîwana emnîyetî ame erjnayene: “Tersê Hewlêrî bêsebeb nîyo. Demê şerê Îranî de herême de 600 ra zêdeyêr hêrişê hewayî bîyî. La badê 23 serran Başûr çira hema zî pawitişê xo hêzêkê teberî ser o ronano? Çareserîya bingeyine yewîya kurdan a.”
Cûdîyî dîyar kerd ke tayê mîlîsê şîayan ê girêdayeyê Îranî vato “Heta ke pêşmerge çekê xo nêrono, ma zî çekê xo nêdanê” û no nawneno ke hedefê înan statuyê Başûrî yo. Goreyê Cûdîyî, Başûr hîrê tehdîdan ryede rîbirî yo: tehdîdo leşkerî yê Îran û grûbanê ey ê fuze û dronan, tehdîdo sîyasî û huqûqî yê Bexdad û krîzo sîyasî yê zereyî.
Cûdîyî vat ke pêşmergeyan vera DAIŞî tecrubeyêko gird qezenc kerd, la şerê ewroyî şerê dron û fuzeyan o û pêşmerge nê şerî rê amade nîyo. Ey dîyar kerd ke hêzê leşkerî yê Başûrî hema zî yew nîyê; tayê girêdayeyê YNKyî, tayê zî girêdayeyê PDKyî yê. Goreyê ey, seke serranê 2014-2015î de gerîlayê PKKyî û pêşmergeyî pîya vera DAIŞî şer kerd, ganî ewro zî hêzanê kurdan mîyan de îtîfaqêk bibo.
Cûdîyî bale ante ser o ke Kerkûk, Dîyala, Mexmûr û Şingal de îhtîmalê aktîfbîyayîşê DAIŞî berz o û vat: “Emnîyetê kurdan ne Waşîngton, ne Tehran, ne Ankara, ne Bexda û ne zî Şam de yo; emnîyetê kurdan tena bi yewîya neteweyî ya kurdan beno.”
