Goreyê xebera NYT’yî, Serokwezîrê Îsraîlî Binyamin Netanyahu Serekê DYA’yî Donald Trump ser o zext keno ke tewrê hêrişêkê hewayî yê newe yê vera Îranî bibo. No hêriş do çar heta hewt rojan dewam bikero.
New York Times (NYT) roja çarşeme, goreyê agahîyanê mesulanê Dewletê Yewbîyayeyê Amerîka (DYA) û Îsraîlî xeberêk weşana. Goreyê na xebere, Binyamin Netanyahu îdareyê Washingtonî ra wazeno ke Îsraîlî reyde tewrê hêrişêkê hewayî yê newe yê vera Îranî bibo. Yeno texmînkerdiş ke operasyon do çar heta hewt rojan dewam bikero.
Xebere de ame vatiş ke Donald Trumpî qerarê xo yo peyên hema nêdayo. Trump agahîyanê îstîxbaratî yê neweyan ê ke Îsraîl ra ameyê, înan ser o vindeno. Ame vatiş ke nê agahîyan de îdia beno ke Îran xebitîyeno ke cebilxaneyê xo yê dronan û fuzeyan newe ra awan bikero û programê çekanê kîmyewî-biyolojîkan de aver şîyo. Ame dîyarkerdiş ke Trump kapasîteyê eskerî yê DYA’yî yo ke Rojhelatê Mîyanênî de bicakerde yo, ey ser o zî vindeno.
Mesulêko berz ê Îsraîlî vera xebera New York Times’î vejîya û îdia kerd ke Netanyahu Trump ser o zext nêkerdo ke mudaxele bikero. Hemverfekê Serokwezaretîya Îsraîlî dîyar kerd ke Netanyahu her tim xebitîyeno ke emnîyetê Îsraîlî bipawo.
Goreyê New York Timesî, hewteyo vîyarte de pêvînayîşê derheqê alternatîfê hêrişêkê newe yê vera Îranî de zêde bîyî. Nê wextî de Serekê Mossadî Roman Gofman şi Washington û Dîrektorê CIA’yî John Ratcliffe û mesulanê îdareyê DYA’yî reyde pêvînayîş kerd. Ame îdiakerdiş ke şefê îstîxbaratê eskerî yê Îsraîlî Shlomi Binder zî hemkaranê xo yê Amerîkayijan reyde derheqê newe ra destpêkerdişê operasyonanê vera Îranî de fikrê xo pare kerdo.











