Hunermend Xêro Abbas ke va proseso ke seba çareserkerdişê meseleyê kurdan dewam keno, ganî bi aştî encam bigîro û vengda hunermendan: “Ma ganî paştî bidê prosesî.”
Şadîya Wisarê ke Şaredarîya Erdîşî (Ercîş) 3 rojan organîze kerd, Xêro Abbas tede ca girewt û va ke ganî proseso ke seba çareserkerdişê meseleyê Kurdan yeno rayraberdene, wayîr vejîyê. Abbas ke seba şadîye ame Wan û Ajansê Mezopotamyayî (MA) reyde qisey kerd, va ke konser Erdîşî rê keyfweşî yo. Abbas ke va serranê dergan ra yo ke Tirkîya de hêrişê vera kulturê kurdan yenê kerdene û wina dewam kerd: “Riyê polîtîkayanê qeyûmî ra demêko derg o ke Wan de nê tewir şadî û festîvalî nêameybî kerdene. Emserr zaf çîyê weşî bîyê. Vengdayîşo ke Newroze de ame kerdene, ey ra pey mîtîngê aştî û nika zî nê tewir festîval û şadî yenê kerdene. Serranê dergan ra yo ke qada kulturî de sînorî ameybî ronayene û seba nînan ma nêeşkayêne beşdar bibê. La wextêko dergî ra pey reya ewile ez Erdîş de beşdarê na şadîye bîya û ez zaf keyfweş a. Serranê verênan her çî destê şaredarîyanê ma de bi. Zaf çalakî ameyêne kerdene û ma eşkayêne beşdar bibê. La tayê problem û zehmetîyan ra xeylê hunermendî ameyê surgunkerdiş û mecbûr mendê ke biremê.”
‘Seba aştî berpirsîyarîya her kesî est a’
Abbaso ke bale ant proseso ke seba çareserkerdişê meseleyê kurdan yeno kerdene ser o, îfade kerd ke nê prosesî de rol û berpirsîyarîyêka girde kewena milanê kurdan ser o û wina dewam kerd: “Hêvîya ma na ya ke nê demî de ke prosesê aştî yeno qiseykerdiş, hunermendê ke ameyê surgunkerdene, agêrê. Ganî hunermendê çar hetanê Kurdîstanî agêrê welatê xo. Prosesê aştî de ke yeno qiseykerdiş, her kesî ser o rolêko gird est o. Bi taybetî rolo tewr gird, kurdê ke Tirkîya de ciwîyenê, înan ser o yo. Hêvîya ma est a û ganî no proses bi lez biqedîyo. Seba aştî rolo tewr gird hunermendan ser o yo. Seba ney ganî ma bixebitê. Seba aştî heta nika gamê girdî ameyê eştene.”
‘Êdî ganî aştî biba’
Xêro Abbas tewr peyên vengda hunermendan ke teber de yê û wina vat: “No prosesê aştî ke dest pêkerd, hunermend, sîyasetmedar, aktor û heme qismanê komelê ser o rolêko gird est o. Seba ke prosesê aştî dewam bikero û bireso encam, ganî her kes paştî bido. Nika ganî aştî biba û no şer biqedîyo. Dinya nika zaf vurîyaya û nika nê şeran rê ca çin o. No pirdê aştî do hem Kurdîstan hem zî her cayê ke kurdî ciwîyenê, uca de xurt bibo.”
