Endamê ZIMAN-DER’î yê Colemêrgî Alî Kaya ke 12 serrî hepisxane de mend, bi resm, hîkaye û şîîranê xo karê xo yê hunerî dewam keno.
Alî Kaya gedeyîya xo ra nat resman virazeno, hîkayeyan vano û şîîran nuseno. Sebebê dewaya kurdîtî ra mabênê serranê 2013-2025 de 12 serrî hepisxane de mendo. Hepisxane de zî hunerê xo aver berdo û bi şîîr, hîkaye û resmanê xo mabênê zîndan û azadî de pirdêk awan kerdo.
‘Gedeyîye ra heta ewro heskerdişê hunerî’
Alî Kayayî vat ke heskerdişê ey ê resman gedeyîye ra yeno û wina dewam kerd: “Keyeyê ma de resmê weşî est bî, tayê înan pîyê mi viraştbî. Dibistana verêne de mamosteyê mi vatêne ke ‘Hunerê to zaf aver şîyo, ti eşkenî şêrî Wan û dibistanêka taybete de aver berî.’ La firsendê mi çin bî. Hepisxane de bi ardimê embazan mi reyna dest bi resman kerd.”

‘Huner ziwanê neteweyî yê merdimî yo’
Alî Kayayî dîyar kerd ke peynî de musabeqaya logoyê Amedsporî de qezenc kerdo û wina vat: “Ganî ma kurdî hetê huner û edebîyatî ra xo aver berê. Eke ma nê hetî ra xo aver nêberê ma do tim binê sîya şaranê bînan de bimanê. Qelsîya ma nezanîye ra ney, bêxîretî û xemsarîya ma ra yena. Huner ziwanê neteweyî yê merdimî yo; dinya bi nê ziwanî to şinasnena.”
‘Ez wazena bi resmanê xo xoza bipawî’
Alî Kayayî vat ke resmanê xo de motîfanê xozayî xebitneno û wina dewam kerd: “Ma kurdî bi serran o ke xoza ra girêdaye yê, ma parçeyêkê na xoza yê. Badê 12 serran wexto ke ez hepisxane ra vejîya mi dî ke xozaya Colemêrgî zaf xirab bîya. Vakur û Başûr de şaristanê ma bîyî sey betonî. Ganî ma cayo şenik ê xozayî ke mendo bipawê. Pawitişê xoza tena bi hawayêko kolektîf beno. Ez wazena bi resmanê xo bale bianî nê problemî ser o.”

Hîkayeya dara goze
Alî Kayayî derheqê şîîr û hîkayeyanê xo de zî qisey kerd û vat: “Merdim bi hunerê xo ziwan û nasnameyê xo hem paweno hem zî dano şinasnayene. Mi hîkayeyanê sey ‘Zembîlfiroş’ û ‘Cembelî’ û dîwananê Perto Begê Hekarî, Ehmedê Xanî, Elîyê Herîrî û Melayê Cizîrî de eşq dî. La edebîyatê kurdkî de mewzûyê xozayî kêmî dî. Seba naye mi fablêk nuşt; fabla mi heywanan ser o nîya, hîkayeya dara goze ya. Xeyr û şer, weş û nebaş ke mîyanê komelê ma de bîyî, mi pêro bi dara goze afirnayî. Bi resm, hîkaye û şîîran merdim eşkeno gedeyanê xo biresno ziwan û edebîyatê kurdkî.”
‘Ganî ma nêkewê binê tesîrê şaranê bînan’
Alî Kayayî peynî de vat: “Ma şarê kurdan bindest ê; eke ma nê afirnayoxîya xo aver nêberê ma do tim binê tesîrê şaranê bînan de bimanê. Dinya qij bîye, bîye sey dewêk. Ganî ma ferqê xo bizanê; şekl, cil û ziwanê xo bipawê û çîyê weş û delalî biafirnê. Ma kitabanê ke derheqê kurdan de ameyê nuştene bi coş wanenê la qedrê tarîxnas, roşnvîr û nuştoxanê xo nêzanê. Ganî ma nê ra pey bi zanist, edebîyat û nasnameyê xo aver şêrê.”










