Festîvala Xoza û Kulturî ya Depî bi konser û govende qedîya. Festîval de Serekwekîla Grûba DEM Partî Gulîstane Kiliç Koçyîgîte seba awankerdîşê destûrêko bingeyên o demokratîk vengdayîşê xutrkerdişê têkoşînî kerd û vat: “Heyetê ma şî Îmralî, hêvîya ma a ya ke qanûnêko li goreyê pêkerdişî bêro meclîs.”
Qezaya Xarpêtî Dep de, Festîvala Xoza û Kulturî ya Depî yê 2026î yo ke hetê Şaredarîya Depî ra ame organîzekerdene, bi konserêko ke tede tewrbîyayîşêko zaf girseyî ra dima qedîya. Aktîvîsta Têgêrayîşê Cinîyan ê Azadan (TJA) Sebahat Tuncel, Serekwekîla Koma DEM Partî Gulîstane Kiliç Koçyîgît, keyeyê kadroyanê verênan ê PKKî Mazlum Dogan û Hayrî Durmuşî, Parlementerê Çewlîgî yê DEM Partî Omer Faruk Hulaku, temsîlkarê rêxistinanê komela sîvîle û partîyanê sîyasîyan, Hemşaredarê Depî Eda Durmuşe û Cafer Ogur û bi hezaran hemwelatî tewrê ci bî.
‘Aştîya girde xoverdayîş reyde ameya’
Gulîstane Kiliç Koçyîgît seba awankerdîşê qanûnê demokratîkî vengdayîşê xurtkerdişê têkoşînî kerd û wina qisey kerd: “Merdimê erjayeyî yê nê welatê rindekî, seba şima pêroyan merheba. Ma şaredarî bi îradeyê şima dest vist. Tîya ra bi hezaran silamî seba Mazlum Dogan û Hayrî Durmuşî. Silamî seba înanê ke bi serran o bi hawayêko bêheq zindanan de xover danê. Bi hezaran silamî seba Îmralî, seba Birêz Ocalanî. Ma dewrêko newe de yê. Ma zaf dejî dîye, erdê ma dejî ra mird bî. Aştîya girde bi xoverdayîşî ameya. Na saete ra tepîya zî ma çi bi dest bifînê, do bi têkoşînî bêro bi dest vistene. Aştîya pîle ya ke bi vengdayîşê Birêz Ocalanî dest pêkerda, ma dewrêko qanûnî de yê. Qanûn çin o, temînat çin o, zemînêko huqûqî çin yo û zemînêko sîyasî nêameyo awankerdene. Ma do seba qanûnî têkoşîn bikerî. Ma do pîya vinderê. Ma do ser bikewî. Ma do a aştîye awan bikerî û o qanûn do bêro. Cayêko qanûnê ke nasname, ziwan û kulturê kurdan qedexe keno de; ganî ma destûrêko bingeyên o demokratîk, destûrêko ke heqê 86 mîlyon merdiman paweno awan bikerî. Ganî ew qanûnê ke serê înkarî de ameyo awankerdene derhal bêro wedaritene. Ma wazenî ke misyonê Birêz Ocalanî biresê şertanê aştîye.”
‘Ma seba aştîyêka birûmete têkoşîn kerd’
Gulîstane Kiliç Koçyîgîte dewamê qiseykerdişê xo de wina vat: “Heyetê ma şî Îmralî. Hêvîya ma a ya ke qanûnêko li goreyê pêkerdişî bêro meclîs. Ma seba aştîyêka birûmete têkoşîn kerd. Ma seba awankerdîşê sîyasatêko demokratîk têkoşîn kerd. Ma seba ke bawerî û nasnameyê şaran bi awayêko azad bêrê ciwîyayene têkoşîn da. Ma wazenî ke rîpelêko newe pîya binusnê. Seba naye ganî ma tena hêvî de nêvinderê. Gureyêko pîl kewno milê ma her yewî ser. Ganî ma seba aştîye têkoşîn bidê. Kes aştîye tepsîya zernêne de pêşkêşê ma nêkeno. Heta ewro ma çi bi dest visto, bi xoverdayîşî bi dest visto. Na saete ra tepîya zî ma çi bi dest bifînê, ma do pîya bi xoverdayîşî dest bifînê. Aştî tena bêvengbîyayîşê çekan nîyo; aştî temînatê aye yo ke domanî bi ziwanê xo yê dayîke pîl bibê û cinîyî bi azadî bîciwîyê. Ma do a aştîya pîle pîya awan bikerî. Têkoşînê ma do ser bikewo.”
Qiseykerdişî ra dima, bi coşêko pîl konser ame dayene. Ewilî Şengul Pak vejîya sehneyî ser. Dima ra Eylûle Nazlier vejîyaye sehne ser . Eylûle Nazlier bi zaravayanê kirmanckî û kurmancî yên kurdkî berhemê xo pêşkêşê goşdaran kerdî û rastê ecibnayîşêko gird ameya. Tewr peynî de bi çepikan, tilîlîyan û sloganan Koma Amed vejîyaye sehne. Ciwanan û şarî zaf rey dirûşmê “Bijî Serok Apo” û “Jin, jiyan, azadî” kerdî berz.
Konsero ke bi hezaran kes tewrê ci bîy, bi girewtişê govende qedîya.
