270 hezar hetgiranê Amedsporî seba maçê Amedspor û Beşîktaşî ya ke siba yena kaykerdene waşt ke bîletan bîgêrê.
Hewteyo 6. yê Lîgê Superî de Amedspor û Beşîktaş do siba Stadyumê Tahîr Elçî yê Amedî de vejîyê hemverê yewbînan. Maç do saete 20.00 de dest pêbikero. Bîletê maçê vizêrî Passolîgî ser o ameyê rotene.
Sey hewteyê vîyarteyî hetgiranê Amedsporî bîletê maçê mîyanê sanîyeyan de herênayî û se hezaran hetgiranê Amedsporî yê ke waştêne bîletan bîgêrê bêbîlet mendî.
Goreyê agahîyanê ke Passolîgî ra ameyê girewtene, seba 15 hezar bîletanê maçê 270 hezar hetgirê Amedsporî kewtî sîstemê bîletgirewtişî û mîyanê 45 sanîyeyan de 15 hezar bîletî ameyî rotene.
Amedspor o ke hewteyo vîyarte taximê Îstanbulî Başakşehîr FK 5 û 0 bin vist, bi 10 puanan rêza 3. de yo. Bi des hezaran hetgirî do siba paştî bidê taximê xo. Eke Amedspor siba Beşîktaşî mexlub bikero, do rêza Lîgê Superî de bibo yê 2.
Eke Amedspor Beşîktaşî mexlub bikero û Galatasaray zî ewro vera Trabzonsporî de bin bikewo, o wext Amedspor beno yewin. Seba mabênê taximê neteweyî yê dewrê 2026-2027î, Super lîgî de 21ê êlûle ra heta 6ê teşrîna verêne maçî nêyenê kaykerdene.
Seba naye Amedspor do 10ê teşrîna verêne de saete 13.30 de Anqara de taximê Gençlerbîrlîgî reyde kay bikero.
