Gedeyanê dewa Arzuogluyî ke çarçewaya Atolyeya Mûzîkî ya Gêroke ya Şaredarîya Amedî ya Şaristanê Girdî de 4 hewteyî perwerdeyê muzîk, rîîtm û sehne girewt, çîyê ke musayî bi konserêko rengin mojnayê.
Konservatuvarê Şaristanî yê Aram Tîgranî ke binê banê Serekîya Daîreyê Kultur, Huner û Karê Komelî yê Şaredarîya Amedî ya Şaristanê Girdî de xebatanê xo keno, programê Atolyeya Muzîkî ya Gêroke yê ke seba ke xebatê kultur û hunerî biresê gedeyan ame destpêkerdene dewam keno. Yew qada xebate ya tewr hîra ya programî ke xebatanê kultur û hunerî tena merkezê şaristanî de sînordar nêverdeno û beno dewan, dewa Arzuogluyî ya qezaya Sûrî bîye. Gedeyê ke bi hewteyan binê kontrolê perwerdekaran de xebatê bingeyên ê rîtîm û notayan kerdî, enstrumanî nas kerdî, kilamî ezber kerdî û sehne ser o perwerde dî, çîyê ke musayî bi konserêk dewe de pêşkêş kerdî.
Konserê de ke dewa Arzuogluyî de ame viraştene, gedeyê ke Atolyeya Mûzîkî ya Gêroke de bi goçikanê rîtmî, borîyanê renginan, darbukayan û materyalanê mûzîkî yê cîya-cîyayan perwerde dîbî, sehne girewt. Konsero ke gedeyan tede repertuarê ke demê atolye de pîya amade kerdbî vatî, bi beşdarîya şarê dewe û keyeyan bî cayê dîmenanê renginan.
Gedeyê ke bi yew vengî kilamî vatî, rîtmê ke musaybî serê sehne de pêşkêş kerdî û netîceyê xebatanê xo yê ke bi hewteyan dewam kerdî, temaşekerdoxan reyde pare kerdî. Beşdarê ke performansê rîtmî û kilamê ke gedeyan vatî ecibnayê, çepikî cenayê. Konser dewe de çarnaye festîvala kultur û hunerî. Konser de hem zî perwerdekarê Atolyeya Mûzîkî ya Gêroke zî kilamî vatî.
Gedeyan konserê Arzuogluyî reyde tena kilamî û rîtmê ke musaybî nêvatê, eynê wextî de tecrubeya ke demê atolye de qezenc kerd, kulturê pîya berardişî û xebata xo ya hunerî zî keyeyanê xo û şarê dewe reyde pare kerdî.
Gedeyî beşdarê xebatanê cîya-cîyan bîyî
Xebatê ke çarçewaya Atolyeya Mûzîkî ya Gêroke de ameyî kerdene tena bi perwerdeyê mûzîkî sînordar nêmendî. Gedeyan gama ke bi goçikanê rîtmî û materyalanê mûzîkî yê renginan veng û tempo keşf kerdî, beşdarê kayanê bi muzîkî, kayanê kuçeyan ê tradîsyonel û faalîyetê sporî zî bîyî.
Gedeyê ke bi rayîrê mûzîk, rîtîm, têgêrayîş û rengan firsendê xoîfadekerdişî dî, hem hunerê xo aver berd hem zî tecrubeyê parekerdişî, piştîpêdayîşî û pîya berardişî ardî ca.
Şarî ra waştişê dewamê aktîvîteyan
Sereka Daîreyê Kultur, Huner û Karanê Sosyalî Zeynep Yaş zî beşdarê aktîvîteyê dewe bîye. Şarê dewe ê ke beşdarê programî bîyî kêfweşîya xo ya konserê gedeyan û xebatanê Atolyeya Muzîkî ya Gêroke îfade kerd.
Şaro ke bale ant muhîmîya xebatanê piştîpêdayîşî yê bi beşdarîya gedeyan a berardişê hunerî, dîyar kerd ke kerdişê xebatanê kultur û hunerî yê seba dewan averşiyayîşê gedeyan ser o xeylê tesîr kenê. Şarî waşt ke aktîvîteyî bibê û nê dewanê cîya-cîyan de zî bêrê viraştene.
Program do dewa Qozan û Qerebaşî de biqedîyo
Programê dewa Arzuogluyî bi konserê gedeyan qedîya. Dewa Zorava de zî gedeyî do ewro konser bidê. Atolyeya Mûzîkî ya Gêroke do 4ê tebaxe de dewa Qozan de û 5ê tebaxe de zî dewa Qerebaşî ya qezaya Sûrî de gedeyan reyde bêra têhet.
