Wezîrê Pawitişî yê Îsraîlî Katz bi eşkerayîyêka vîdeoyî Serekê Hîzbullahî Naîm Qasêmî bi kiştiş tehdîd kerd.
Wezîrê Pawitişî yê Îsraîlî Yîsrael Katzî hişyarîyêka huşke daye Serekê Hîzbullahî Lubnan Naîm Qasêmî. Hişyarî de dîyar kerd ke seba hêrişanê vera Îsraîlî yê wextê roşanê Pesaxê de ameyê kerdene, ê do nêeşkê dayîşê “bedêlo giran” ê nê hêrişî ra bixelisîyî.
Yîsrael Katzî badê kombîyayîşî kampê leşkerî yê Kiyraye de ke Fermandarê Pêroyî yê Îsraîlî Eyal Zamîr û karmendê payeberzî yê bînî tewrê ci bîbî, Serekê Hîzbullahî tehdîd kerd. Katzî vîdeo de wina vat: “Mesajêkê min o zelal seba Sekreterê Pêroyî yê rêxistina terorîst ê Hîzbullahî, Naîm Qasêmî rê est o. Wexto ke welatijê Îsraîlî seba pîrozkerdişê şewa Sedirî ronişê, şima û hemkarê şima do îmkan nêvînê ke qerarê hêrişêkî bidê. Seba ke ney ra ver ti û embazê to, do bedêleko zaf giran bidê.”
Katz: Îsraîl tehdîd û hêrişan reyde apey game nêerzeno
Katzî îfade kerd ke do hêrişî Îsraîlî rê apey game nêdê eştiş û welat do tu wext nêagêro rewşa asayîşî ya ke Şerê Îsraîl û Hamasî yê 7ê teşrîna verêne ya 2023î ra ver. Katzî hewteyo vîyarte de eşkera kerdbi ke Îsraîl do başûrê Lubnanî ra heta Çemê Lîtanî bikero binê kontrolê xo. Wezîrî dîyar kerd ke na game do seba awankerdişê “bendê pawitişî” yê vera Hîzbullahî bêra eştene.”
Muctaba Hamaney seba Serekê Hîzbullahî dua kerd
Raybero Berz ê Îranî Ayetullah Muctaba Hamaney, mesajê xo yê 1ê Nîsane 2026î de Serekê Hîzbullahî Qasêmî rê erşawitbi, dîyar kerd ke ê seba Serekê Hîzbullahî dua kenê û hêvî kenê ke ê do “Plananê neyarê sîyonîstî pûç bikerê” la mesajê Hamaneyî de tu çîke dîyar nêbî ke rejîmê Îranî do paştîdayena îdeolojîk ra teber, hetkarîyêka madî ra zêdeyêr çîyêk bido Hîzbullahî.
