Wan de wendekarî bi seba ke mergê Rojîn Kabaîş o bişik bêro zelalkerene û kampusan de emnîyet bêro temînkerdene çalakîyanê xo dewam kenê.
Wendekarî dîyar kerd ke heta ke îdareyê unîversîteyan û dezgehê eleqedarî gamanê şêberan nêerzê, ê do gek çalakîyan ra nêverdê.
Wendekarê ke çalakîyanê xo kampusan de dewam kenê, ANFyî rê qisey kerd û reaksîyonanê xo îfade kerd.
Dîlan Ergul ke îfade kerd ke ê do destûr nêdê ke merdişê Rojîne Kabaîş bêro normalîzekerdene, dîyar kerd ke hêzê dewlete cehd kenê çalakîyî bêrê vindertiş û vat: “Ewro zî ma vera mudahaleyê hêzanê emnîyetî mendî. Bi rojan o ma tîya yê, ciwanî vengê xo berz kenê labelê dewlete nêverdana wendekarî şarî reyde bêrê têhet. Dewleta ke katîlan pawena, barîkatan ronana ma ver. La ma heta ke netîce bigîrê têkoşînê xo dewam bikerê.”
Dîlan Ergul ke îfade kerd ke waştişo verên o yo rektor îzah bikero seba çi dekewto Dezgehê Tibê Adlî û rektor îstîfa bikero, vat: “Ma zanê ke îdareyo ke katîlan pawena, nêeşkena wendekaran bipawo. Ma wazenê bizanê ke katîlê Rojîne kam o. Ma seba Rojîne edalet wazenê û ma wazenê vernîya qirkerdişanê cinîyan ê neweyan bigîrê.”
Wendekaran ra Metîn Orakî zî fade kerd ke îdareyê unîversîte û dezgehê eleqedarî nêeşkenê berpirsîyarîye ra biremê û vat: “Bi rojan o ma seba edaletî tîya yê. Ma însanê biwicdan ê û ma heqê xo yê tewr normalî şuxulnenê. Labelê ê nêwazenê vengê ma berz bibo, ma dorpêç kenê. Ma wazenê merdişê Rojîne Kabaîş de îdareyê unîversîte, rektor û prosesê malî bêrê zelalkerene. Heta ke edalet bêro temînkerdene ma çalakîyanê xo do dewam bikerê.”
