Wendekaranê Unîversîteya Rojava ferzkerdişê çarçewaya entegrasyonî protesto kerd.
Yeno waştene ke Unîversîteya Rojava çarçewaya entegrasyonî de Unîversîteya Firatî ra bêra girêdayene. Unîversîte bajarê Qamişlo yê Vakur û Rojhelatê Sûrîye de 2016 ra nat falîyet kena. Çarçewaya entegrasyonî de tayê fakulteyî nêyenê qebulkerdene û ferz beno ke teberê Ziwan û Edebîyatê Kurdkî de beşê bînî bi erebkî bêrê wendene. Vera ferzkerdişan çalakîya wendekar û mamostayan dewam kena.
Bi ameyîşê Komîteya Entegrasyonî yê Unîversîteya Rojava protestoyî bîyî gird. Komîte eşkerayî nêdaye û naye ser o wendekaran dîyar kerd ke komîte nêverdanê zere. Reaksîyonan ser o komîte kampus ra abirîyaye û wendekaran hem verê mektebî de hem zî kuçe de demêko derg bi slogananê “Bê ziman jiyan nabe” û “Kî ne em, kurd in em” rayîrşîyayîş kerd.
Wendekaran da zanayene ke heta ke waştişê înan bêrê qebulkerdene têkoşîn do dewam bikero.










