Sendîka û rêxistinê heqê setirîyayîşî ke Parîs de ameyî têhet, îlan kerd ke vera zêdebîyayîşê xercê cuye 20, 21 û 22ê teşrîna peyêne de do çalakîyanê hemparan organîze bikerê.
Temsîlkarê sendîka û rêxistinanê heqê setirîyayîşî yê Îspanya, Fransa, Îtalya, Îngilîstan, Portekîz, Yûnanîstan û Belçîka 3yê teşrîna peyêne de paytextê Fransa Parîs de ameyî têhet. Temsîlkaran bale ante kêmîbîyayîşê hêzê herînayîşî yê Ewropa ser o û qerar da ke teşrîna peyêne de munayîşanê koordînekerdeyan organîze bikerê. Verfeka Konfederasyonê Sendîkayanê Kiradaran ê Îspanya Carme Arcarazo vat: “Seba ke demêko krîtîk de pîya aver şêrê, ma qerarê koordînasyonî da.”
Rêxistinî wazenê ke heqê setirîyayîşî bigîrê garantî û fîyatê keye, werd û enerjî bikewê binê kontrolî. Rêxistinî wazenê ke heqdest û meaşê teqawudan zêde bibê. Mîyanê waştişanê înan de garantîkerdişê xizmetanê pêroyîyan, verê her çîyî perwerde, weşî û xizmetê pêroyî, naskerdişê heqê karî yê koçberan û bacgirewtişê dewlemendan zî est ê. Rêxistinî sewbîna wazenê ke polîtîkayê newera çekdarbîyayîşî û averberdişê sotemenîyanê fosîlan biqedîyê.
Îspanya de sendîkayanê serekeyan bi waştişanê keye û heqdestî venga grevê pêroyî da ke 11ê teşrîna peyêne de bêro kerdene. Fransa de zî sendîkayê CGT û Solidaires û Komeleya Heqê setirîyayîşî (DAL) beşdarê vengdayîşê çalakîya hempare benê. Benjamin Ball ke koordînasyonê Êlekzerdan ra beşdarê kombîyayîşê Parîsî bi, vat: “Mîlyonan kesî do vejîyê kuçeyan û do bimojnê ke ganî şarî hetê mîlyarderan ra ney, xo bi xo ra bêrê îdarekerdene.”
Îtalya de temsîlkara Sendîkaya USB Chiara Capretti vat ke çalakîyê ke karkeranê lîmanan dayî destpêkerdene, hîna zaf hîra benê. Grevê pêroyî de ke 30ê teşrîna verêne de ame kerdene, seyan hezaran wendekar û karkerî vejîyayî kuçeyan. Capretti îfade kerd ke waştişî bêcewab mendî û vat: “Hukmat cewab nêdano tu kesî.”
Grevê ciwanan ê vera sotemenîyanê fosîlan ke rêxistinêka wendekaran a portekîzije do 20ê teşrîna peyêne de organîze bikera, 20 welatan ra zî piştî girewte.
