Hemsereka DBP’yî ya Wanî Gonul Uzunay derheqê kombîyayîşanê şarî de qisey kerd û dîyar kerd ke nê kombîyayîşî seba prosesî zaf muhîm ê. Gonul Uzunayî wina vat: “Bi nê kombîyayîşan ma wazenî ke şar bi zîhnîyetê komunalî û xebatêka kolektîfe xo rêxistin û awan bikero.”
Partîya Herêman a Demokratîke (DBP), çarçewaya prosesê Aştî û Komelê Demokratîkî de zaf şaristana û qezayan de kombîyayîşê şarî kerdî. Nê kombîyayîşan de sîyasetê AKP’yî û dewlete, pêşnimûneyê qanûnê çarçewa ke rojev de yo, gamenêeştişê dewlete, rolê sîyasetê demokratîkî û fikrê şarî ameyî munaqeşakerdene. Şarî hêvî û rexneyê xo yê seba sîyasetê demokratîkî îfade kerdê.
Hemsereka DBP’yî ya Wanî Gonul Uzunay ke bi xo zî tewrê kombîyayîşanê Wanî bîbî, derheqê amancê nê kombîyayîşan û fikranê şarî de qisey kerd.
‘Reya yewin a ke problem hende radîkal yeno munaqeşakerdene’
Gonul Uzunay dîyar kerd ke serre û nêm o ke prosesê Aştî û Komelê Demokratîkî dewam keno û no reya yewin o ke meseleyê kurdî wina bi hawayêko radîkal yeno munaqeşakerdene û wina vat: “Bi vengdayîşê rêzdar Abdullah Ocalanî meseleyê kurdî zemînê demokrasî de ma eşkenê vajî reya yewin a hende radîkal yeno munaqeşakerdene. Ma zî sey DBP’yî bi taybetî demê peyênî de ma kampanyaya bi sloganê ‘Ma vatişê aştî şarî reyde awan kenî’ kombîyayîşan virazênî.”
‘Amanc awankerdişê zîhnîyetê komunalî yo’
Gonul Uzunay derheqê amancê kombîyayîşan de zî erjnayîşî kerdî û nê çîyî vatî: “Amancê ma o yo ke bi nê kombîyayîşan ma şarî reyde hem prosesî munaqeşa bikerî, hem zî girêdayeyê prosesî, ma zanê ke xeylê persê komelî zî mîyanê şarê ma de benî. Bi çaresernêkerdişê meseleyê kurdî ma bi xeylê probleman reyde rî bi rî manenî. Nê prosesî de ganî hetêk ra aştî û hetê bîn ra zî komelo demokratîk bêro awankerdiş ke aştîyêka birûmete zî bêra awankerdiş. Bi nê kombîyayîşan ma wazenî şar bi zîhnîyetê komunalî, xebatêka kolektîfe xo rêxistin û awan bikero. Bi nê amancî ma vat ke ma nê kombîyayîşan bikerê.”
‘Ganî êdî îqtîdar û dewlete gamanê şênberan bierzê’
Gonul Uzunay da zanayene ke bi nê kombîyayîşan vejîya orte ke şar zî kombîyayîşanê winasînan wazeno û wina dewam kerd: “Şar wazeno ke rehet xo îfade bikero ke xo bido famkerdiş. Ma dî ke waştişê şarê ma o yo ke çareserîyêka demokratîke bera ca, aştîyêka birûmete bêra awankerdiş. Berpirsîyarîya tewr muhîme ke kewena serê dewlete û îqtîdarî, la hama zî nêanê ca ke no proses ser kewo. Nê semedî ra ma nê kombîyayîşan de dî ke şar êdî prosesî re bawer nêkeno. Dewlete mecber a ke gamanê şênberan bierza. Yanî heta nika çi kewto ser milê şarê kurd, Têkoşîna Azadîya Kurdî û Rayberê Şarê Kurdî rêzdar Abdullah Ocalanî, kerdo.”
‘Rexne û pêşnîyazê şarê ma seba ma çarçewayêk vete orte’
Gonul Uzunay da îfade kerd ke nê kombîyayîşan de rexneyê şarî seba înan yanî partî est bîyî û şarî nê rexne û pêşnîyazê xo mîyanê çarçewayêka rêxistinî de îfade kerdê û wina vat: “Nê rexne û pêşnîyazê şarê ma seba ma çarçewayêk vete orte, ganî ma mîyanê xo de bierjnê, xeta xo ya sîyasetî, ma heta nika senî xebatî rayra berdê, plansazî kerda; plansazîyanê xo yê neweyan de bîyarî vernîya xo. No seba ma zaf muhîm o.”
‘Ganî êdî Abdullah Ocalan bi hawayêko fîzîkî azad bo’
Gonul Uzunay peynîya qiseykerdişê xo de waştiş û hêvîyê şarî yê ke nê kombîyayîşan de vejîya orte îfade kerdê û qiseykerdişê xo wina qedêna: “Sewbîna reyna waştiş û hêvîya şarê ma o bi ke muxatabo sereke yê nê prosesî rêzdar Abdullah Ocalan o, ganî rêzdar Abdullah Ocalan bireso statuyê xo û bi hawayêko fîzîkî azad bo. Waştişo sereke yo dîyin zî o bi ke heqê şarê kurdî yê ziwan û kulturî bêrê caardiş. Bi hezaran girewteyê sîyasîyî est ê, rewşa înan ganî dîyar ba û ê biresnî azadîya xo. Bi hezaran embazê ma sirgun de yê, ganî nê pêro agêrê welatê xo. Nê waştişê şarê ma eşkera û zelal bîyî.”
