Hemsereka Pêroyî ya DBPyî Çigdem Kiliçgun Uçare munaqeşeyê ke elewîtîye ser o yenê ramitene, nirxnayî û vat ke têkilîya mabênê Hereketê Azadîye û elewîyan vîyarteyî ra heta ewro têmîyan a: “Hereketê Azadîye eynî wext de hereketêkê elewîyan o.”
Munaqeşeyanê elewîtîye ke bi eşkerayîyanê Altan Tanî dest pêkerd, yenê waştene ke bibê kampanyayêk vera Hereketê Azadîya Kurdan. Grûbêk ke xo sey “roşnvîranê elewîyan” pênase kena, bi vateyanê Rayber Apoyî ke çarçewaya xo ra ameyî cîyakerdene, waşt ke mabênê Hereketê Azadîye û komelê elewîyan de cîyayî û tansîyon bimojno. Hemsereka Pêroyî ya DBPyî Çigdem Kiliçgun Uçare nê munaqeşeyî û nêzdîbîyayîşê Hereketê Azadîye ANFyî rê nirxnayî.
Uçare vat ke no proses şekil dano ameyoxê şaranê na cografya û coka ganî her çî bi şefafî bêro munaqeşekerdene û temsîlkarê her hetî rasterast biresê komelî: “Çîyo ke birêz Ocalanî verê vato, beyan û kitabanê ey de est o. Çîyo ke nika vano, wexto ke şertê xebata azade bibê û o çapemenî û temsîlkaranê komelî reyde bêro têhet, vejîyeno meydan. Wexto ke Hereketê Azadîya Kurdan bi ronayîş, perspektîf, qodê îdeolojîk û pêardoxanê xo reyde bêro nirxnayene, vatişo ke o mîyanê elewîtîye de ameyo dinya, mubalexe nîyo.”
‘Hereket komelê elewîyan qodê tewr bingeyinî yê merdimîye vîneno’
Uçare ard ziwan ke beşêkê qadroyanê ronayox û îdarekaran ê Hereketî elewîyê kurd, tirk û tirkmenan ê: “Hereketê Azadîye eynî wext de hereketêkê elewîyan o; hereketêk o ke vîrê xoverdayîşê vera qetlîamanê Koçgirî, Dêrsim û Mereşî têkoşînê xo de beno. Hereket komelê elewîyan sey yew şar û bawerîyanê bingeyinan ra ke qodê tewr bingeyinî yê merdimîye anê, vîneno û qîmetanê bawerîya elewîye sey qîmetanê bingeyinan ê awankerdişê komelê demokratîkî gêno xo dest.”
Uçare vat ke cehdê birêz Ocalanî no yo ke bingeyê zîhnîyetê qetlîamkerî yê vera elewîyan ê demê Yawuz û Îdrîsê Bitlîsî ra heta ewro bêro wedarnayene: “Vera barbarîya DAÎŞî ke xo sey ‘sunnî’ pênase kerdêne û hedefê xo yo verên elewî bîyî, pêşengîya şerî Hereketê Azadîya Kurdan kerde. Birêz Ocalan sîyasetmedar o zî; seba caardişê perspektîfê Haştî û Komelê Demokratîkî wazeno ê kesê ke kişta ey de û hemverê ey de yê, înan reyde têkilî rono. Nê heme cehd û têkoşînî sey ‘îttîfaqê sunnîyan’ namekerdiş neheqîya tewr gird a; îtîfaqê hereketê sîyasî yê kurdan îttîfaqê haştî, şar û bawerîyan ê demokratîk ê.”
‘Roşnvîrbîyayîş fehmkerdişê serebûdî bi temamî wazeno’
Uçare derheqê beyannameyê “roşnvîranê elewîyan” de vat ke roşnvîrbîyayîş fehmkerdişê serebûdî bi temamî wazeno û mojnayîşê hereketêk û pêşengê ey bi hawayêko cîya yê raştîye, problem o: “Ziwan û vindertişo ke haştî û hesasîyetanê elewîyan yewbînan ra dûrî keno, kesî rê tu çî qezenc nêkeno. Doktrînê elewîtîye yo ’72 miletan ra bi yew nezerî ewnîyayîş’ û hedefê Komelê Demokratîkî yê hereketê sîyasî yê kurdan têkoşînêkê ameyoxî yê ke yewbînan vînenê. Ê kesê ke raştîye tehrîf kenê û bi manîpulasyonan seba îqtîdarî qewet arê kenê, ganî çewt nêrê vatene. Hereketê Azadîye elewîyan û tu beşê komelî xo rê nêkeno dişmen; xora beşêko muhîm ê Hereketê Azadîye gedeyanê komelê elewîyan ra yeno pê. Kotî ra biewnîyê zî, bêmentiq o.”
