ÇEWLÎG – Hemsereka DBP Çigdem Kiliçgun Uçare Dewa Armelîya ke girêdayeyê qezaya Çewlîgî Çermê ya de şarî de ameyê têhet û Ucare vat: “Şarê kurd gerê wayirê nê prosesî vecîyo.”
Hemsereka Pêroyî ya Partîya Herêman a Demokratîkan (DBP) Çigdem Kiliçgun Uçar û temsîlkaranê DBP bi wesîleya têhetameyîşanê “Ma şarî reyde qalê aştîye kenê” xebatanê xo roca diyine de Çewlîg dewam kerd. Bernamêyî Dewa Hacîyan a qezaya Kanîreşî de destpêkerd û dimara merkezê Kanîreşî û şande zî dewa Armelî ya ke giradeyeyê qezaya Çermê de qedîya.
Çigdem Kilicgun Uçare îtîyade qisey kerd û vat: “Ewro çîyo ke ma tede yê, meseleya bawerî-bêbawerîye ra pîlêrî; Şarê Kurdî û hêzanê demokrasî ser o, hêvîya înan a aşîtîye, hêvîya înan a ameyoxî rehin girowtene ser o ameya ronayene. Naye ra pey henî nêşono, na peymane şar pêro zaneno, ayera ganî tayê çî bivurîyê. Reyna şêrê, ey meclîsî de zaf partîyê polîtîkî estê. Serranê 90’an ra heta ewro zî şarê Kurdî partîyanê polîtîkanê ke nameyê xo ro nayê û pîya şarê xo de xebatê xo, polîtîkaya xo ya demokratîke rameno. HEP’î ra heta ewro ma şenê zaf nameyan bîyarê ziwan. Ma kurdî cayê xo de sîyasetê xo de mendîme. Aqilê dewlete inkarê Kurdan de mend. Her çîyo ke ma kerd suç ame vînayiş. Çi ra? Huquq û qanûnanê xeletan ra. Çike ey qanûn û huquqî de ma çin ê. Qanûn û huquqê înan de ke ma çin ê, ayra ma zî nasnameya xo pawitene.”
Çigdem Kilicgun Uçare peynîyê qiseykerdişê xodê bal ant tekoşînê şarê kurd û vat şarê kurd gera wayirê no prosesê vecê.
Bername badê persan û cevaban ame qedênayîş.
