Keyeyanê şehîdan ê Sêrtî ke nameyê gedeyanê înan newe ameyî eşkerakerdene, ard ziwan ke şarê kurdan seba haştî û azadîye bedelê giranî dayî: “Şehîdî seba ameyoxê ma benê roşnîye.”
Maya Raperîne (Sema Oguz) Riha Oguz vat ke kênaya înan tena şehîda înan nîya, şehîda heme şarê kurdan a: “Sereyê Serekîya ma, gerîlayanê koyan û şarê kurdan sax bo. Ma bi aye sereberz ê. Heta yew noqtaya gonî bedenê ma de bibo, ma fek na dewa ra nêveradanê.”
Pîyê Kahraman Botanî (Dundar Kara) Kamûran Karayî vat: “Heme şehîdî şehîdê ma yê. Ma sey keyeyanê şehîdan waştêne ê sax û silamet bêrê, ma înan bivînê; la nêbî, şehîd bîyî.”
Endamêkê keyeyê şehîd Ahmet Aktaşî vat ke ê têkoşîno ke dewam keno rast û pîroz vînenê û waştişê înan no yo ke keda şehîdan bibo roşnîyêk seba azadîya şarê kurdan: “Hende bedel dayî zî ma hema zî vanê haştî, wayûbirayî û aramî. Wa ne dayîkê kurdan, ne yê ereban, ne zî yê tirkan bibermê. Hezaran serrî yo ma pîya ciwîyenê; ma qet nê şehîdanê xo xo vîr ra nêkenê.”
Maya Zinar Osyanî (Firat Babat) Zarîfe Babat vat: “Lajê mi tena yê mi nîyo, yê heme Kurdîstanî yo. Heta ke ma sax bê, ma mîyanê na dewa de yê. Zerrîya ma dejena, ma nêwazenê zerrîya kesî bideja; ma haştîyêka menda wazenê.”
Nêzdîya şehîdan Sumeye Akkoyun vat: “Ma nêwazenê êdî gonî birişo, bes o. Ê zî misilman ê, ma zî misilman ê; heme dinya do yê şima bo? Ma wazenê erdanê xo ser o biciwîyê.”
Maya Koçerîn Dîlane (Mahrûfe Aktaş) Ayşe Aktaş zî vat: “Ma haştî, aramî û edalet wazenê. Ma nêwazenê êdî zerrîya tu dayîke biveşo. Wa êdî kes nêro kiştene.”
