Kombîyayîşê şarî yê bi sernameyê “Ma do Aştî û Komelê Demokratîkî reyde biserkewê” Dewa Reşikî ya Farqînî de Endama MYK’î û Verfeka Komîsyonê Ziwan, Kultur û Hunerî yê DEM Partî Cemîle Turhalli qisey kerd û va ke dayîkê ma her tim wayîrê aştî û ziwanê xo vejyayî.
Kombîyayîşê şarî yê bi sernameyê “Ma do Aştî û Komelê Demokratîkî reyde biserkewê” Dewa Reşikî ya Farqînî de bi beşdarîya zêdeyê 250 kesan ame viraştiş. Kombîyayîş ra Kombîyayîş de Endama MYK û Verfeka Komîsyonê Ziwan, Kultur û Hunerî yê DEM Partî Cemîle Turhalli, Endamê PM’î yê DEM Partî Cebbar Leygera, Dayîkanê Aştî û zaf hûmarî de cinîyî beşdar bîyê.
Kombîyayîş bi rêzgirewtişî dest pê kerd, dima sînevîzyon ame temaşekerdiş.
Helbet ma resenê armancê xo
Kombîyayîş de Endama MYK’î û Hemverfeka Komîsyonê Ziwan, Kultur û Hunerî yê DEM Partî Cemîle Turhalli qisey kerd û wina va: “Şima bi xêr ameyî, ez destê dayîkan maçî kena. Seba tevger, seba partî dayîkê ma rûmet ê. Ma nêzdîbîyayîşê dayîkan ra kelecanêko gird û hêvî gênê. Çimkî ma zanenê dayîkê ma senî wayîrê herre, aştî û ziwanê xo vejyayê. No ser zî dayîkê ma bîyê sembola aştî. Dayîkê ma her tim pêşengîya aştî kerd. Dayîkê ma, leçega xo seba aştî bikar ardê. Ez şima vînena, hîsgerîya mi hîna zêde bena, têkoşînêko bêhempa dîyena. Çimkî nê domanan şima pîl kerd. Dayîka Birêz Ocalanî, zî Dayîka Uveyş bî. Eke dayîkê ma serberz nêbînî do domanê înan zî wina serberze nêbînî. Helbet keda şima ya, ez hewna şima rê spas kena.”
Cemîle Turhalli bal ant ser vengdayîşê bi vîdeoyî yê Rayberê Şarê Kurdî Abdullah Ocalanî rê û wina domna: “ Vîdeo ser ma, hemin de bandorêko gird viraşt, vengê Serekî ra verpersê Hereketa ci zî ame, no ser resa armancê xo. Seba ke ê xo rê bawer bîyî, ma zî înan rê bawer ê. Çîke ê zî şarê xo rê bawer ê, ma bi vatişê Bijî Serok Apo pîl bîyê. Ez vînena nika zî gedeyê vanî; Bijî Serok Apo. Çîke seba înan zî Serek û Rayber o. Na hişmendî qet nîna vîrakerdene. Helbet reseno armancê xo la asan nêbeno.”
