Hukmatê Federalî yê Swîsreyî rayna eşkera kerd ke o amade yo ke mabênê dewleta Tirkî û Têgêrayîşê Azadîye yê Kurdan de rolê mabênkarîye bigîro xo ser û va ke ganî qerarê ke Derheqê Rayberê Şarê Kurdî Abdullah Ocalan de hetê Dadgeha Heqanê Merdiman a Ewropa (AÎHM) ra ameyê dayene, bêrê caardene.
Prosesê “Aştîye û Komelê Demokratîkî” yo ke hetê Rayberê Şarê Kurdî Abdullah Ocalan ra yeno averberdene, hetê platformanê mîyanneteweyîyan ra paştî gêno. Konseyê Federalî yê Swîsreyî ke verî zî eşkera kerdbi ke eke her di hetî zî taleb bikerê, o do vengdayîşê Rayberê Şarê Kurdî Abdullah Ocalan ê 27ê Sibate rê rolê mabênkarîye bigîro xo ser, cewabêk ke dayo yew pêşnîyaznameyo newe de zî na helwesta xo rayna ard ziwan.
Konseyo Federal (Hukmat), cewab da pêşnîyaznameyê bi sernameyê “Tirkîya de prosesê aştîye bi PKK’yî reyde: Paştîdayîşê Swîsreyî çî yo?” ke hetê Wekîlê Parlamentoyê Federalî û Endamê Komîsyonê Têkilîyanê Teberî Nicolas Walderî ra seba ke Konseyo Federal cewab bido, amebi pêşkêşkerdene.
Konseyê Federalî bale ant ser ke proses hetê înan ra bi kêfweşîye yeno pêşwazîkerdene û nê vatî: “Konseyo Federal, prosesê aştîye yo ke nika Tirkîya de est o, bi kêfweşîye pêşwazî keno û eke hetê heme hetan ra bêro waştene û bi no hawa bikero paştî bido, o ifade keno ke amade yo ke xizmetanê xo yê mabênkarîye pêşkêş bikero.”
Ganî bêrê caardene
Konseyê Federalî, persê ke derheqê şertanê tecrîdî û azadîya Rayberê Şarê Kurdî Abdullah Ocalan de ameybî perskerdene rê zî cewab da û îzeh kerd ke ganî dewleta Tirkî qeraranê ke AHÎM’î derheqê dewaya Rayberê Şarê Kurdî Abdullah Ocalan de dayê, bîyaro ca.
Konseyê Federalî nê îfadeyî şuxulnayî: “Derheqê şertanê tepiştişî yê Abdullah Ocalanî de, Swîsre paştî dana caardişê qeraranê Dadgeha Heqanê Merdiman a Ewropa û tewsîyeyanê Komîteyê Verîgirewtişê Îşkenceyî yê Ewropa (CPT). Swîsre, bi hawayêko muttemadîyen veng dana Tirkîya ke wa berpirsîyarîyanê xo yê derheqê heqanê merdiman û prensîpanê dewleta huqûqî rê riayet bikero; a na hem çerçeveyê têkilîyanê dîyinan de hem zî platformanê xeylî hetîyan de kena.”
Swîsre, pêameyîşanê aştîye yê ke peynîya prosesanê şer û pêkewtişî de aver şonê de, bi rolê xo yê mabênkarî û çimdarîye yê mabênê hetan ra yeno zanayene.
